بلوچی ایک قدیم اور خوبصورت زبان ہے جو پاکستان کے شمال مغرب میں واقع صوبہ بلوچستان میں ہی نہیں بلکہ ایران اور افغانستان میں بھی بولی جاتی ہے۔
اس زبان کی اپنی ایک ادبی روایت ہے لیکن وقت کے بہاؤ کے ساتھ ساتھ یہ معدومیت کی جانب تیزی سے گامزن تھی لیکن اس حسین زبان کو حال ہی میں گوگل نے اپنی ترجمہ سروس ’گوگل ٹرانسلیٹ‘ میں شامل کرلیا ہے۔
گوگل کے اس اقدام سے دنیا بھر میں بسنے والے بلوچوں کو بے پناہ فائدہ پہنچے گا۔ اب گوگل ٹرانسلیٹ کی مدد سے بلوچی زبان کے مواد کا دنیا کی دیگر زبانوں میں ترجمہ بآسانی ممکن ہوسکے گا۔
وی نیوز سے گفتگو کرتے ہوئے بلوچی اکیڈمی کے وائس چیئرمین ہیبتان عمر نے کہا کہ بلوچی یوں تو 3، 4 ممالک میں بولی جاتی ہے لیکن دنیا بھر میں اس کے بولنے والے کئی افراد موجود ہیں۔
مزید پڑھیں:گوگل میپ پر اڈیالہ جیل عمران خان کے نام سے منسوب
ہیبتان عمر نے کہا کہ بلوچی زبان کسی بھی ملک کی زبان نہیں جس کی وجہ سے اس کے معدوم ہونے کے خطرات کئی گنا زیادہ ہیں۔ انہوں نے کہا کہ بلوچی زبان میں ادب تو پیدا ہو رہا ہے لیکن یہ ٹیکنالوجی کی زبان نہیں کیونکہ انٹرنیٹ پر بلوچی زبان میں بہت کم مواد موجود ہے۔
ان کا کہنا تھا کہ حال ہی میں گوگل ٹرانسلیشن نے بلوچی کو اپنی ترجمہ فہرست میں شامل کیا ہے جو ایک خوش آئند عمل ہے۔
دراصل گوگل سنہ 2006 سے گوگل ٹرانسلیشن کی سہولت فراہم کر رہا ہے لیکن سال 2020 سے گوگل کو یہ محسوس ہوا کہ بلوچی بھی ایک ایسی زبان ہے جس کو بولنے والے بڑی تعداد میں موجود ہیں اس لیے اس زبان کو حال ہی میں گوگل نے اپنی فہرست میں شامل کرلیا۔
مزید پڑھیں:گوگل نے جی میل اور دیگر سروسز کے لیے اے آئی ماڈل متعارف کروا دیا
وی نیوز سے بات کرتے ہوئے بلوچی اکیڈمی کے ذمے دار و مترجم شرف شاد نے کہا کہ ہم بلوچی اکیڈمی میں ڈیٹا بنا رہے ہیں جس کے ذریعے بلوچی زبان کو انگریزی زبان سے ہم آہنگ کیا جارہا ہے۔
بلوچی زبان کو حال ہی میں گوگل ٹرانسلیشن نے اپنی فہرست میں شامل کیا ہے جس میں بلوچی اکیڈمی کا بھی بہت بڑا حصہ ہے۔
گوگل ٹرانسلیٹ میں بلوچی زبان کے اضافے سے زبان کو بچانے اور فروغ دینے میں مدد ملے گی۔
