مشیر اطلاعات خیبرپختونخوا بیرسٹر سیف نے کہا کہ ہم نے ہمیشہ پاک فوج کو سپورٹ کیا ہے، بانی پی ٹی آئی کئی بار کہہ چکے ہیں کہ کسی ادارے سے کوئی لڑائی نہیں ہے، اسٹبلشمنٹ سے گلے شکوے ہیں اور وہ تو رہیں گے۔
خیبرپختونخوا کے مشیر اطلاعات بیرسٹر سیف نے اپنے ایک بیان میں کہا کہ کچھ لوگوں کے ساتھ ذاتی اختلاف کی گنجائش ہوتی ہے اور یہ ماضی سے چل رہا ہے، ہم نے کسی کے بھی خلاف جارحانہ انداز میں بیان بازی نہیں کی، اختلاف تو کسی سے بھی ہوسکتا ہے۔
مزید پڑھیں: پی ٹی آئی کو انتشاری ٹولہ کہنے سے ’بنوں واقعہ‘ پر کمیشن کی تحقیقات متاثر ہوں گی، بیرسٹر سیف
بیرسٹر سیف نے کہا کہ کسی ادارے کے ساتھ ہماری کوئی لڑائی نہیں ہے، ہمیں اسٹبلشمنٹ سے گلے شکوے رہے ہیں، اور پالیسیوں پر اختلاف تو ہوسکتا ہے، لیکن پاکستان کے مفاد میں جو کچھ ہوگا اس کے لیے کھڑے رہیں گے۔
انہوں نے کہا کہ پاکستان تحریک انصاف (پی ٹی آئی) کو کالعدم قرار دینے کی کوشش کی جا رہی ہے، کوشش کرتے رہیں کچھ حاصل نہیں ہوگا۔ اگر ہم پر یہ الزام ہے کہ ہم ملک کے مفاد کیخلاف کام کررہے ہیں تو میں اس کی تردید کرتا ہوں۔