مبارک احمد ثانی کیس کے فیصلے پر قومی اسمبلی میں بحث: اہم معاملے پر سیاسی جماعتیں مل بیٹھیں، وزیر قانون

پاکستان کے ایوان زیریں قومی اسمبلی میں سپریم کورٹ کی جانب سے مبارک احمد ثانی نظرثانی کیس میں دیے گئے فیصلے پر گرما گرم بحث ہوئی ہے، اور ارکان اسمبلی نے کہا ہے کہ عدالتوں کو آئین کو ری رائٹ کرنے کا اختیار نہیں، نبی کریم ؐ کی حرمت پر آنچ برداشت نہیں کی جائے گی۔

وفاقی وزیر قانون اعظم نذیر تارڑ نے کہاکہ عدالتوں کو آئین کی تشریح کا اختیار ہے لیکن آئین کو دوبارہ لکھنے کا اختیار نہیں، نبی کریم ﷺ کی حرمت پر آنچ آئے گی تو آواز بھی اٹھائیں گے اور ہاتھ بھی اٹھائیں گے۔

قومی اسمبلی کے اجلاس میں اظہار خیال کرتے ہوئے انہوں نے کہاکہ آرٹیکل 295 سی نبی کریم ﷺ کی ذات کے حوالے سے ہے۔

واضح رہے کہ 24 جولائی کو سپریم کورٹ نے مبارک احمد ثانی کیس میں نظرثانی درخواستیں جزوی طور پر منظور کرتے ہوئے کہا تھا کہ احمدیوں کے حوالے سے وفاقی شرعی عدالت اور سپریم کورٹ فیصلوں سے انحراف نہیں ہو سکتا۔

یہ بھی پڑھیں مبارک احمد ثانی کیس میں نظرثانی کی درخواستیں جزوی طور پر منظور

وزیر قانون نے خطاب کرتے ہوئے کہاکہ آقا ﷺ کی حرمت کے لیے ہر شخص مرمٹنے کو تیار ہے، اس معاملے کو لا اینڈ جسٹس کمیٹی کو بھیجنا چاہتے ہیں تو اس کو ضرور دیکھیں۔

اعظم نذیر تارڑ نے کہاکہ کسی کو پاکستان کے منصف اعلیٰ کو قتل کرنے کا فتویٰ دینے کا اختیار نہیں، اس طرح کے بیانات پر ریاست کی زیرو ٹالرینس پالیسی ہونی چاہیے۔

انہوں نے کہاکہ تمام جماعتیں ساتھ بیٹھ جائیں اس پر بات کر لیتے ہیں، پارلیمان میں ہر بات شریعت، آئین اور قانون کے مطابق ہونی چاہیے۔

یہ بھی پڑھیں احمدی شہری کی ضمانت کے فیصلے کیخلاف سپریم کورٹ نے علما سے تحریری رائے طلب کرلی

انہوں نے کہاکہ ہمارا ملک آئین و قانون کے تابع ہے، کوشش ہونی چاہیے ہماری طرف سے کوئی ایسی بات نہ ہو کہ گستاخوں کو موقع ملے۔

فیصلے پر فی الفور پارلیمانی کمیٹی بنائی جائے، حنیف عباسی

اجلاس میں اظہار خیال کرتے ہوئے مسلم لیگ ن کے رکن اسمبلی حنیف عباسی نے کہاکہ اس فیصلے پر فی الفور پارلیمانی کمیٹی بنائیں اور علما کرام کو بلائیں، اس کا فوری حل نکالنا ضروری ہے کیونکہ لوگوں کے دل دکھے ہوئے ہیں۔

سپریم کورٹ کے فیصلے سے ابہام پیدا ہوا، علی محمد خان

پی ٹی آئی کے رکن قومی اسمبلی علی محمد خان نے اظہار خیال کرتے ہوئے کہاکہ سپریم کورٹ کے فیصلے سے ابہام پیدا ہوا، لیکن کسی بھی صورت ریاست اور حکومت کے علاوہ کسی کو سزا دینے کا اختیار نہیں۔

انہوں نے کہاکہ ہمارا مطالبہ ہے کہ حکومت اور سپریم کورٹ اپنی ذمہ داریاں پوری کریں، اس معاملے پر خصوصی پارلیمانی کمیٹی بنائی جائے۔

کیا آئین کو ری رائٹ کرنا آرٹیکل 6 کے زمرے میں نہیں آتا؟ عبدالقادر پٹیل

پاکستان پیپلزپارٹی کے رکن قومی اسمبلی عبدالقادر پٹیل نے خطاب کرتے ہوئے کہاکہ انسانی حقوق کے نام پر مغرب سے یہ فتنہ پھیلایا جاتا ہے، یہ مرتد وہاں جاکر کہتے ہیں پاکستان میں ہم پر بہت ظلم ہورہا ہے، یہ ہمارا ٹائٹل استعمال کرتے ہیں۔

انہوں نے کہاکہ ایک ایسی کمیٹی بنائی جائے جو اس قسم کے فیصلے دینے والوں کی سزا تجویز کرے، آئین کے آرٹیکل کو اگر ری رائٹ کیا گیا ہے تو کیا وہ آرٹیکل 6 کے زمرے میں نہیں آتا، ہمارے ایمان پر حملہ مت کیا جائے۔

جج کی رائے کو جوتے کی نوک پر رکھتا ہوں، عبدالغفور حیدری

جمعیت علما اسلام (ف) کے رکن اسمبلی عبدالغفور حیدری نے اظہار خیال کرتے ہوئے کہاکہ جج صاحبان بتائیں انہیں آئین میں ترمیم کرنے کا اختیار کہاں سے ملا، جج صاحب کی ایسی رائے کو جوتے کی نوک پر رکھتا ہوں۔

انہوں نے تجویز دی کہ آج ہی ایوان میں قرارداد مذمت منظور ہونی چاہیے۔

بعد ازاں اسپیکر نے معاملہ قومی اسمبلی کی قائمہ کمیٹی برائے قانون انصاف کے سپرد کردیا اور کل 31 جولائی کو ہی اجلاس منعقد کرنے کی ہدایت کردی۔