عفت عمر ایک معروف ماڈل اور اداکارہ ہیں اور وہ اپنے خیالات کا کھل کر اظہار کرنے کے لحاظ سے خاصی مشہور بھی ہیں۔
وہ حقوق نسواں کی بھی علمبردار ہیں اور صدق دل سے فیمنسٹ تحریک کی حمایت کرتی ہیں۔
یہ بھی پڑھیں: خلیل الرحمان قمر کا اغوا، ڈراما بنانے گئے تھے اور فلم بن گئی
عفت عمر اپنی سیاسی یا سماجی رائے کی وجہ سے اکثر تنازعات میں بھی گھر جاتی ہیں لیکن چوں کہ وہ سچ کی علمبردار ہیں اس لیے اپنے خیالات کے اظہار میں کوئی لگی لپٹی نہیں رکھتیں۔
ملک کے معروف ڈرامہ نگار خلیل الرحمٰن قمر ایک ہنی ٹریپ میں پھنس کر ایک گینگ کے ہاتھوں اغوا، مار پیٹ اور لوٹ مار کا نشانہ بنے جس کے بعد انہیں ایک بہت بڑے تنازعے کا بھی سامنا ہے۔
گینگ نے خلیل الرحمان سے بھتہ بھی وصول کیا اور ان ہی میں سے ایک خاتون کے ساتھ ان کی ایک ویڈیو بھی لیک ہوچکی ہے جو سوشل میڈیا پر وائرل ہے۔
یہ بھی پڑھیے: نازیبا ویڈیو لیک ہونے کے بعد خلیل الرحمان قمر کا ردعمل آگیا، ویڈیو سے متعلق کیا کہا؟
اس صورتحال کے بعد سب سے تکلیف دہ بات یہ ہے کہ خلیل الرحمان کے اہل خانہ بھی ٹرولنگ کا شکار ہو رہے ہیں جبکہ دوسری جانب معروف ڈرامہ نگار اپنے اغوا کاروں کے خلاف مقدمہ لڑ رہے ہیں۔
عفت عمر ویسے تو (خواتین کے بارے میں عجیب و غریب تبصروں کے باعث) خلیل الرحمٰن قمر کے خلاف ہی رہی ہیں اور انہوں نے ڈرامہ نگار کے خواتین اور تحریک نسواں کے بارے میں خیالات پر ہمیشہ ان پر تنقید کی ہے۔
مزید پڑھیے: خلیل الرحمان قمر کی بیٹی نفرت کا شکار، سوشل میڈیا پر تنقید کا سامنا
لیکن پھر بھی ان کا کہنا ہے کہ گو خلیل الرحمان قمر کے خیالات انہیں مایوس ضرور کرتے ہیں لیکن وہ ان کی تحریروں سے محبت کرتی ہیں۔
ویڈیو لیک ہونے پر عفت عمر نے خلیل الرحمان قمر کی حمایت کا اظہار حقوق نسواں کے ایک مشہور زمانہ نعرے ’میرا جسم، میری مرضی‘ کے ساتھ کیا ہے حالاں کہ خلیل الرحمان قمر اس نعرے سے نفرت کرتے ہیں۔
عفت عمر کا کہنا ہے کہ وہ اس بارے میں کبھی کچھ نہیں کہیں گی کہ 2 رضامند بالغ افراد اپنے جسم کے ساتھ کیا کرتے ہیں۔ انہوں نے خلیل الرحمان قمر کی جانب اشارہ کرتے ہوئے کہا کہ ’ان کا جسم ان کی مرضی‘۔
