کنویئر پارلیمانی ٹاسک فورس بلال اظہر کیانی نے کہا ہے کہ حکومتی اقدامات سے مہنگائی کی شرح میں کمی آرہی ہے، مہنگائی کی شرح گزشتہ 3 سال میں سب سے کم ہے۔
کنویئر پارلیمانی ٹاسک فورس بلال اظہر کیانی نے اسلام آباد میں نیوز کانفرنس میں بتایا کہ مہنگائی کم کرنا، لوگوں کو باوسائل کرنا، روزگار دینا اور لوگوں کی قوت خرید بڑھانا حکومت کی پہلی ترجیع ہے، 2013 سے 2018 تک نواز شریف نے پاکستان کو ترقی دی، نواز شریف نے لوڈ شیڈنگ ختم کی، غربت کم کی اور ساتھ ہی ساتھ مہنگائی بھی کم کی اور روزگار بھی بڑھایا۔
یہ بھی پڑھیں: وی ایکسکلوسیو: عمران خان نے جان بوجھ کر آئی ایم ایف کا پروگرام خراب کیا: بلال اظہر کیانی
بلال اظہر کیانی نے کہا کہ 2018 میں نواز شریف حکومت چھوڑ کرگئے تو مہنگائی کی شرح 3.9 فیصد تھی، اور کھانے کی اشیا کی مہنگائی کی شرح صرف 2.3 فیصد تھی، مگر ساتھ ترقی بھی تھی، آئی ایم ایف کا پروگرام مکمل ہونا بھی تھا۔
انہوں نے کہا کہ وزیراعظم ایف بی آر میں ریفارمز کرنا چاہتے ہیں، ایف بی آر میں ریفارمز کا مطلب ہے کہ ٹیکس کا نظام بہتر ہوگا، ٹیکس ادا کرنے والوں کے لیے آسانی ہوگی، جو لوگ ٹیکس نہیں دے رہے وہ ادا کریں گے، ٹیکس نہ دینے سے ان کے حصے کا بوجھ جو دوسروں پر پڑرہا ہے، وہ بوجھ کم ہوگا، معیشت کا پہیہ اسی طریقے سے آگے چلے گا۔
یہ بھی پڑھیں: وی ایکسکلوسیو: 2017 کے سیاسی تجربے میں شامل لوگوں کو اس کی قیمت ادا کرنی چاہیے، کوارڈینیٹر وزیراعظم بلال اظہر کیانی
ان کا کہنا ہے کہ وزیراعظم شہباز شریف بجلی کے نظام میں بھی اصلاحات چاہتے ہیں، چاہے ٹرانسمیشن کا نظام ہو یا ڈسٹری بیوشن کا نظام ہو، سارے نظام کو بدلنے کی بات چل رہی ہے، جس میں این ٹی ڈی سی کے پورے اسٹریکچر کو بدلنے کی بات بھی ہے، اس سے بجلی کی پیداروار، ٹرانسمیشن اور ڈسٹری بیوشن کے خرچے کم ہوں گے اور جب خرچے کم ہوں گے تو نرخ کم ہوں گے۔
