پاکستان بیت المال سے ہر سال ہزاروں لوگ مختلف شعبوں میں مستفید ہوتے ہیں، مستحق مریضوں کو ماہانہ بنیادوں پر ادویات اور علاج کے لیے رقم ادا کی جاتی ہے، طلبا کو سکالرشپ دی جاتی ہے، بیوہ اور غریب لڑکیوں کو سلائی کڑھائی کا کام سکھایا جاتا ہے اس کے علاوہ بھی بیت المال مختلف منصوبے جاری رکھے ہوئے ہے، گزشتہ ایک سال میں 35 ہزار سے زائد افراد بیت المال سے مستفید ہوئے ہیں۔
پاکستان بیت المال ایک منظم ادارہ ہے، مستحق افراد کو رقم کی ادائیگی مینجنگ ڈائریکٹر یعنی ایم ڈی کی منظوری کے بعد ہوتی ہے تاہم چند ماہ سے ایم ڈی کی تقرری نہ ہونے کے باعث ادارے کو فنڈز کی فراہمی میں تاخیر کا سامنا ہے، جس کے باعث شہریوں کو سخت مشکلات کا سامنا ہے۔
یہ بھی پڑھیں: آپ سیاست کر سکتے ہیں یا چیریٹی، ایک ساتھ دونوں کام کرنا مناسب نہیں، زمرد خان
گزشتہ سال دسمبر میں ایم ڈی عامر فدا پراچہ کی ریٹائرمنٹ کے بعد یہ آسامی خالی تھی جس کے بعد مارچ میں سید طارق محمود الحسن کو ایم ڈی بیت المال تعینات کیا گیا تاہم ایک ماہ سے کم وقت میں ہی انہوں نے استعفیٰ دے دیا، جس کے بعد سے ایم ڈی کی تقرری نہ ہو سکی ہے اور مستحق افراد کو فنڈز کی فراہمی کا سلسلہ منقطع ہے۔
پاکستان بیت المال میں تعینات ڈائریکٹر پینشن عبدالمنان چوہدری نے وی نیوز کو بتایا کہ مستحق افراد کو پینشن کی ادائیگیوں کا سلسلہ کبھی نہیں رکا ہے، تمام پینشنرز کو جولائی 2024 کی پینشن کی ادائیگی بھی کر دی گئی ہے۔
مزید پڑھیں: وی ایکسکلوسیو: حکومت نے کوئی لنگر خانہ بند نہیں کیا بس نوالے گننے کے ڈرامے بند کیے ہیں: شازیہ مری
پاکستان بیت المال کے ایک سینئر آفیسر نے وی نیوز کو بتایا کہ یہ بالکل درست بات ہے کہ ایم ڈی کی تقرری نہ ہونے سے فنڈز کی ترسیل تاخیر کا شکار ہے، تاہم گزشتہ روز سیکریٹری بیت المال تعینات کیے جاچکے ہیں اور انہیں فنڈز کی ترسیل کا اختیار تفویض کیا گیا ہے۔
’رواں ہفتے میں حکومت کی جانب سے بجٹ بھی جاری ہو جائے گا جس کے بعد آئندہ ہفتے سے تعلیم اور علاج و معالجہ کے لیے مستحق افراد کو فنڈز جاری ہونا شروع ہو جائیں گے۔‘
