چین کے اعلیٰ سطح کے وفد نے آج گوادر کا دورہ کیا ہے، جس میں مستقبل میں سرمایہ کاری کے مواقع، ترقیاتی پروگراموں، نیو گوادر انٹرنیشنل ایئرپورٹ اور پاک چائنا فرینڈ شپ اسپتال سمیت موجودہ منصوبوں کی پیشرفت پر تبادلہ خیال کیا گیا۔
وفد نے ساؤتھ فری زون اور گوادر پورٹ کا بھی دورہ کیا اور مستقبل کی تجارتی اور اقتصادی سرگرمیوں کے لیے ان کی اہمیت کو اجاگر کیا۔
یہ بھی پڑھیں پاکستان کی معاشی ترقی میں سی پیک کا اہم کردار ہے، چینی قونصل جنرل
چینی وزارت خارجہ کے مسٹر ونگ فوکانگ کی سربراہی میں چینی وفد اور گوادر پورٹ اتھارٹی کے حکام کے درمیان ملاقات بھی ہوئی۔ اور اس موقع پر چین پاکستان اقتصادی راہداری (CPEC) فیز ٹو کے منصوبے پر بھی تبادلہ خیال کیا گیا۔
وزیر خزانہ بلوچستان ظہور بلیدی نے تمام شرکا کو خوش آمدید کہا جس کے بعد بریفنگ میں گوادر پورٹ اتھارٹی کے چیئرمین پاسند خان بلیدی نے گوادر پورٹ کی کامیابی کے لیے پاک چین اقتصادی راہداری کی اہمیت بیان کی۔
یہ بھی پڑھیں شہباز شریف کی چینی صدر سے ملاقات، سی پیک کی اَپ گریڈیشن پر اتفاق
مسٹر یو بو کے چیئرمین، چائنا اوورسیز پورٹ ہولڈنگ کمپنی COPHC نے بھی فورم کو تجارت کو مضبوط بنانے کے لیے قیمتی تجاویز سے آگاہ کیا۔
’چین اور پاکستان لازوال دوست ہیں، جس میں ایک آہنی دوستی کی تاریخ شامل ہے۔ اس وقت صنعتی تعاون بہت اہم ہے، چین کے تعاون سے بڑے منصوبوں پر عملدرآمد خطے میں معاشی انقلاب برپا کرے گا، اور بلوچستان کے لوگوں کے لیے روزگار کے مواقع پیدا ہوں گے‘۔
وفد نے مختلف منصوبوں پر کام کرنے والے تمام چینی ملازمین کے لیے حفاظتی اقدامات پر بھی تعریف اور اطمینان کا اظہار کیا۔
وفد کے دورے کے بعد یہ توقع ہے کہ یہ مستقبل کے چیلنجز سے نمٹنے کے لیے پاکستان کی صلاحیت میں اہم کردار ادا کرے گا۔
یہ بھی پڑھیں سازشی ٹولہ سی پیک فیز ٹو منصوبے کو ناکام بنانے کے لیے سرگرم ہوگیا، احسن اقبال
پاکستان اور چین کے غیر متزلزل عزم کی وجہ سے اعلیٰ سطح کے دورے کو روکنے کا مخالفانہ ایجنڈا ناکام ہو گیا ہے۔
26 رکنی وفد میں چینی سفارتخانے کے نمائندے مسٹر یانگ گوانگ یوان اور مسٹر چن جنجی کے علاوہ پاکستانی حکام اویس منظور سُمرا، وزارت منصوبہ بندی، ترقی و خصوصی اقدامات کے مسٹر ذوالفقار علی شالوانی اور وزارت سمندری امور سے ظفر علی شاہ شامل تھے۔
