ایران کی سرحد سے پاکستان کی حدود میں کی گئی فائرنگ سے 4 سیکیورٹی اہلکار شہید ہوگئے ہیں اور یہ فائرنگ ضلع کیچ کے علاقے جلگئی میں کی گئی۔
انٹرسروسز پبلک ریلیشنز (آئی ایس پی آر) نے بتایا ہے کہ ایران کی جانب سے دہشت گردوں کے ایک گروپ نے ضلع کیچ کے جلگئی سیکٹرمیں سرحد کے ساتھ سیکیورٹی فورسز کے جوانوں کونشانہ بنایا۔
فوجی ترجمان کے مطابق حملے میں شہید ہونے والوں میں نائیک شیر احمد ،لانس نائیک محمد اصغر ،سپاہی محمد عرفان اور سپاہی عبدالرشید شامل ہیں۔
آئی ایس پی آر کے مطابق دہشت گردوں کے خلاف کارروائی کے لیے ایران سے رابطہ کیا جارہا ہے تاکہ مستقبل میں ایسے واقعات کی روک تھام یقینی بنائی جاسکے۔
دریں اثناء وزیراعظم شہبازشریف اور وفاقی وزیر داخلہ رانا ثناء اللہ نے دہشت گردوں کی جانب سے سیکیورٹی فورسز کو نشانہ بنانے کی شدید مذمت کرتے ہوئے کہا کہ جوانوں کی قربانیاں رائیگاں نہیں جائیں گی۔
شہباز شریف نے کہا کہ قوم کے بیٹے مادر وطن کے لیے جانوں کے نذرانے پیش کررہے ہیں،ہم اللہ کی مدد سے دہشت گردوں کا خاتمہ کر کے دم لیں گے۔
وزیراعظم اور وزیر داخلہ نے سوگوار خاندانوں سے دلی ہمدردی کا اظہار کیا ہے۔
