روسی صدر ولادی میر پیوٹن نے پاکستانیوں کے نام اپنے پیغام میں کہا کہ دونوں ممالک کے درمیان دوستانہ تعلقات استوار ہیں، دوطرفہ تعاون، علاقائی مسائل بشمول انسداد دہشتگردی اور افغان تنازعے کے حل کے لیے مشترکہ کوششوں سے اچھے نتائج حاصل ہو رہے ہیں۔
اسلام آباد میں روسی سفارتخانہ نے صدر ولادی میر پیوٹن کا پیغام جاری کیا، روسی صدر نے کہا کہ پاکستانی عوام ، صدر مملکت اور وزیراعظم پاکستان کو یومِ آزادی کے موقع پر دل کی اتھا گہرائیوں سے مبارکباد پیش کرتا ہوں۔
روسی صدر نے کہا کہ مجھے یقین ہے کہ روس اور پاکستان کے تعمیری تعلقات مستقبل میں بھی ہمارے عوام کے مفاد، بین الاقوامی سلامتی اور استحکام کو یقینی بنانے کے لیے مزید فروغ پائیں گے۔
انہوں نے صدر مملکت آصف علی زرداری اور وزیر اعظم شہباز شریف کو اچھی صحت اور کامیابی کی دعا دی، اور کہا کہ آپ کے تمام ہم وطنوں کے لیے امن اور خوشحالی کی نیک تمنائیں پیش کرتا ہوں۔
