صدرمملکت آصف زرداری نے 104 پاکستانیوں اور غیرملکی افراد کو اعزازات دینے کی منظوری دے دی۔ خدمات عامہ کے شعبے میں نمایاں خدمات کے اعتراف میں ذوالفقار علی بھٹو شہید کو نشان پاکستان، کھیل کے شعبے میں ارشد ندیم کو ہلال امتیاز، مراد سدپارہ کو ستارہ امتیاز، ادب کے شعبے میں ناصر کاظمی مرحوم کو نشان امتیاز بعد از وفات دینے کی منظوری دی گئی ہے۔
ایوان صدر کی جانب سے جاری اعلامیے کے مطابق پاکستان کے لیے خدمات کے اعتراف میں 104ملکی اور غیر ملکی شخصیات کو یہ اعزازات 23 مارچ 2025 کو خصوصی تقریب تقسیم اعزازات میں دیے جائیں گے۔
مزید پڑھیں: یوم پاکستان: ملک کے لیے نمایاں خدمات انجام دینے والوں کو اعزازات سے نوازا گیا
اعلامیے کے مطابق پاکستان کے لیے خدمات کے اعتراف میں پرنس عبدالعزیز بن سلمان السعود کو ہلال پاکستان، سائنس اور ٹیکنالوجی کے شعبے میں عامر حفیظ ابراہیم کو ہلال امتیاز، ڈاکٹرغلام محمد علی اور سردار محمد آفتاب احمد خان وٹو کوستارہ امتیاز، ڈاکٹر سارہ قریشی، ڈاکٹر رفیع الدین اور پروفیسر ڈاکٹرعثمان قمر کو تمغہ امتیاز سے نوازا جائے گا۔
اس کے علاوہ تعلیم کے شعبے میں سعدیہ رشید کو ہلال امتیاز، ضیاالحق، ڈاکٹرسلیمان شہاب الدین اور سید اظہر حسین عابدی کو ستارہ امتیاز عطا کرنے کی منظوری دی گئی ہے۔ شعبہ طب میں پروفیسر ڈاکٹر شہریار اور ڈاکٹر زریاب کو ہلال امتیاز، ڈاکٹرعاکف اللّٰہ خان، ڈاکٹر سید عابد مہدی کاظمی، اکرام اللّٰہ خان کو تمغہ امتیاز دیا جائے گا۔
یہ بھی پڑھیں: کن نامور فنکاروں، اداکاروں، موسیقاروں کو قومی اعزازات سے نوازا گیا؟
اعلامیے کے مطابق فنون کے شعبے میں کالن ڈیوڈ کو ستارہ امتیاز، ارشدعزیز ملک، بختیار احمد، بیرسٹر ظفراللہ کو تمغہ امتیاز، فریحہ پرویز، حامدرانا، شیبا ارشد اور نوید احمد بھٹی کوصدارتی ایوارڈ برائے حسن کارکردگی سے نوازا جائے گا۔
