پاکستان تحریک انصاف (پی ٹی آئی) کے بانی چیئرمین عمران خان نے پارٹی کارکنوں کے نام اپنے پیغام میں کہا ہے کہ 8 ستمبر کو جلسہ ہر حال میں ہوگا، اب اگر کوئی میرا نام لے کر جلسہ منسوخ کرنے کا بتائے تو اس کی بات کا یقین نہیں کرنا۔
بانی پی ٹی آئی کی بہن علیمہ خان نے عمران خان کا پیغام سناتے ہوئے کہا کہ عمران خان نے پی ٹی آئی کی قیادت کو پیغام بھیجا ہے کہ 8 ستمبر کو جلسہ ہر حال میں ہوگا، جلسے کے انتظامات مکمل کریں اور لوگوں کی جلسہ گاہ پہنچنے میں مدد کریں۔
یہ بھی پڑھیں: علیمہ خان نے جلسہ منسوخی کا ذمہ دار پی ٹی آئی قیادت کو قرار دے دیا
انہوں نے کہا کہ جو لوگ کل راستوں سے واپس لوٹے خان صاحب ان کے دکھ اور تکلیف کو محسوس کررہے تھے کہ لوگوں کو جلسہ گاہ پہنچنے کے لیے سفر کی مشکلات اٹھانا پڑیں اور ان کا خرچہ بھی ہوا۔
علیمہ خان نے بتایا کہ عمران خان نے کہا کہ وہ 8 ستمبر کے جلسے میں شرکے کے خواہشمند کارکنوں اور عوام کو اپنے پیغام میں کہا ہے کہ اگر اب آپ یہ سنیں کہ عمران خان نے جلسہ منسوخ کردیا ہے تو آپ نے یہ بات نہیں ماننی، کوئی میرا نام استعمال کرے تو اس کا یقین نہیں کرنا۔
یہ بھی پڑھیں: عمران خان نے جلسہ مؤخر کرنے کا فیصلہ کیوں کیا؟
انہوں نے کہا کہ عمران خان کا کہنا تھا کہ اب آپ کے پاس جلسے کا این او سی ہے، اگر آپ کو راستے میں کوئی رکاوٹیں نظر آئیں تو انہیں ہٹاکر جلسہ گاہ پہنچیں کیونکہ یہ آپ کا قانونی اور آئینی حق ہے۔
واضح رہے کہ گزشتہ روز اسلام آباد میں میڈیا سے گفتگو کرتے ہوئے علیمہ خان نے پی ٹی آئی جلسہ ملتوی کیے جانے پر تحفظات کا اظہار کرتے ہوئے کہا تھا کہ پی ٹی آئی کی موجودہ قیادت میں کارکنان کا سامنا کرنے کی ہمت نہیں تھی تو بانی پی ٹی آئی سے جلسہ ملتوی کرنے کا فیصلہ کروا دیا، موجودہ لیڈرشپ کا بانی پی ٹی آئی کو باہر نکالنے کا ارادہ ہی نہیں ہے، پارٹی کا چیئرمین باہر بیٹھا ہے، اس نے فیصلہ کیوں نہیں کیا، یہ فیصلے خود کرتے ہیں اور نام بانی پی ٹی آئی کا لگا دیتے ہیں۔
علیمہ خان کے علاوہ پی ٹی آئی کی سیاسی کمیٹی اور کور کمیٹی کے ممبران نے بھی جلسہ ملتوی کرنے کے فیصلے سے متعلق لاعلمی اور تحفظات کا اظہار کیا تھا۔
