خیبر پختونخوا میں ایم پاکس کا دوسرا کیس بھی کنفرم ہوگیا جس کے بعد صوبے میں ان کیسز کی تعداد 2 ہوگئی۔
یہ بھی پڑھیں: منکی پاکس کے حوالے سے ملکی ایئر پورٹس پر کڑی نگرانی جاری ہے
پبلک ہیلتھ ڈیپارٹمنٹ کے مطابق نوشہرہ سے تعلق رکھنے والا 47 سالہ مریض دبئی سے پشاور آرہا تھا کہ ائیرپورٹ پر اسکریننگ کے دوران اس میں منکی پاکس کی علامات سامنے آگئیں جس کے بعد اسے پولیس سروسز اسپتال میں آئسولیٹ کردیا گیا۔
ایم پاکس دوسرے کیس کی تفصیلات پیش کرتے ہوئے ڈائریکٹر پبلک ہیلتھ ارشاد روغانی نے وی نیوز کو بتایا کہ نوشہرہ سے تعلق رکھنے والے 47 سالہ شخص میں ایم پاکس کی تصدیق ہوچکی ہے۔
مزید پڑھیے: خطرناک وائرس منکی پاکس سے کیسے بچا سکتا ہے؟
ڈاکٹر ارشاد روغانی نے بتایا کہ مریض کی پولیس اسپتال میں تفصیلی ہسٹری لی گئی اور نمونہ پبلک ہیلتھ ریفرنس لیب بھیجا گیا۔ خیبر میڈیکل یونیورسٹی ریفرنس لیب نے پی سی آر کے ذریعے مریض میں ایم پاکس کی تصدیق کی۔
انہوں نے کہا کہ مزید تجزیے کے لیے نمونے نیشنل انسٹیٹیوٹ اف ہیلتھ اسلام آباد بھجوائے گئے ہیں اور 3،4 دن میں رپورٹ آنے کے بعد میڈیا کے ساتھ تفصیلات شیئر کردی جائیں گی۔
مزید پڑھیں: ایم پاکس: ڈبلیو ایچ او کا ہنگامی صورتحال کا اعلان، مکمل آگاہی فراہم کردی
واضح رہے پختونخوا میں ایم پاکس کا پہلا کیس پچھلے ہفتے مردان سے رپورٹ ہوا جس کے بعد پراونشل آؤٹ بریک کمیٹی کے اجلاس کے نتیجے میں ضلعی اور صوبائی سطح پر آئیسولیشن وارڈز اور ریسپانس ٹیمیں تشکیل دے دی گئی ہیں۔
