پاکستان کرکٹ بورڈ (پی سی بی) نے بنگلہ دیش کے خلاف دوسرے ٹیسٹ میچ کے دوران طلبا کے لیے اسٹیڈیم میں مفت داخلے کا اعلان کردیا۔
پاکستان کرکٹ بورڈ کی جانب سے کہا گیا ہے کہ طلبا کو اسٹیڈیم میں داخلے کے لیے اسکول یونیفارم میں آنا ہوگا اور اپنے تعلیمی اداروں کے کارڈ بھی دکھانا ہوں گے۔ اور وہ کسی بھی وی آئی پی اور پریمیم انکلوژر سے میچ دیکھ سکیں گے۔
یہ بھی پڑھیں راولپنڈی ٹیسٹ میں سست اوور ریٹ پر پاکستان اور بنگلہ دیش پر جرمانہ عائد، شکیب الحسن بھی زد میں آگئے
پی سی بی نے بتایا ہے کہ طلبا کے اسٹیڈیم میں مفت داخلے کی پالیسی کا اطلاق پی سی بی گیلری یا پلاٹینم باکس میں نہیں ہوگا۔
پی سی بی کے مطابق طلبا کے اسٹیڈیم میں مفت داخلے کا فیصلہ ان کی حوصلہ افزائی کے لیے کیا گیا ہے۔
یاد رہے کہ پاکستان اور بنگلہ دیش کے درمیان دوسرا ٹیسٹ میچ 30 اگست سے شروع ہوگا، اس سے قبل سیریز کے پہلے ٹیسٹ میچ میں بنگلہ دیش نے پاکستان کو 10 وکٹوں سے شکست دے دی تھی۔
پی سی بی کے مطابق پہلے ٹیسٹ میچ کی طرح 2 روٹس پر مفت شٹل بس سروس چلتی رہے گی جس سے تماشائیوں کو راولپنڈی کرکٹ اسٹیڈیم پہنچنے میں آسانی ہوگی۔
یہ بھی پڑھیں سرجری ابھی باقی ہے پہلے آلات تو مکمل ہونے دیں، چیئرمین پی سی بی
پہلا روٹ ایوی ایشن گراؤنڈ، راول روڈ، مری روڈ سے علامہ اقبال پارک کے داخلی دروازے تک چلے گا، جبکہ دوسرا روٹ گورنمنٹ سیٹلائٹ ٹاؤن کالج فار بوائز، سکتھ روڈ، مری روڈ سے علامہ اقبال پارک کے داخلی دروازے تک جائے گا۔
