حکومت نے 15 اگست سے پیٹرول کی فی لیٹر قیمت میں 8 روپے 47 پیسے کی خاطر خواہ کمی کرکے عوام کو ریلیف دیا تھا، جس کے بعد اب کہا یہ جا رہا ہے کہ یکم ستمبر سے مزید 5 روپے فی لیٹر کمی ہونے والی ہے۔ تاہم، گزشتہ 15 دنوں میں خام تیل کی قیمت میں 3فیصد تک اضافہ ہوا ہے اور نئی قیمت 81ڈالر فی بیرل سے تجاوز کرگئی ہے جبکہ ڈالر کی قدر بھی 278روپے 50 پیسے پر مستحکم ہے۔
اس حساب سے پیٹرولیم مصنوعات کی قیمتوں میں کمی تو ممکن نظر نہیں آرہی اور لگ ایسا رہا ہے قیمتوں میں کچھ اضافہ ہوگا، البتہ ہوسکتا ہے کہ عوام کو ریلیف دینے کے لیے کچھ کمی کردی جائے گی۔ پیٹرول کی قیمتوں کے حوالے سے حتمی فیصلہ وزارت خزانہ 31اگست کی شب اوگرا کی سمری کی روشنی میں کرے گی۔
مزید پڑھیں: بین الاقوامی فیول پرائس میں کمی کے بعد پاکستان میں پیٹرول اور ڈیزل کتنا سستا ہوسکتا ہے؟
حکومت نے آخری مرتبہ جب 15اگست کو پیٹرول کی قیمت میں 8روپے 47پیسے کی کمی کی تھی، تو اس وقت بھی انٹر بینک میں ڈالر کی قیمت 278.50روپے تھی جوکہ 15 پیسے اضافے کے بعد اب 278.65روپے ہوگئی ہے، اور خام تیل کی قیمت 79.71ڈالر فی بیرل تھی، جو اب بڑھ کر 81.5 ڈالر فی بیرل ہوگئی ہے۔
گزشتہ برس کے اختتام پر عالمی منڈی میں خام تیل کی قیمتوں میں نمایاں کمی کے باعث برینٹ خام تیل کی قیمت 73ڈالر فی بیرل تک گرگئی تھی، جبکہ ماہ اپریل کے آغاز سے خام تیل کی قیمت میں مسلسل اضافہ ہوا اور قیمت 7 ڈالر کے اضافے سے 90 ڈالر فی بیرل تک پہنچ گئی تھی۔ تاہم، اب قیمت 80 ڈالر فی بیرل ہوگئی ہے۔ یکم مئی سے اب تک پیٹرول کی قیمت میں 28 روپے کی کمی کی جاچکی ہے۔
گزشتہ سال ستمبر سے پاکستان میں روپے کی قدر مستحکم اور ڈالر سستا ہو رہا تھا اس دوران انٹربینک میں ڈالر307روپے سے کم ہو کر 23 اکتوبر کو 275 روپے کا ہوگیا تھا۔ رواں برس کے آغاز سے ایک مرتبہ پھر ڈالر کی قیمت میں کمی کا سلسلہ جاری ہے، جو 289روپے سے کم ہو کر اس وقت 278 روپے 50 پیسے ہوگئی ہے۔
یہ بھی پڑھیں: پیٹرول کی قیمت میں 10 روپے کی بڑی کمی ممکن ہے؟
حکومت کی جانب سے جاری نوٹیفکیشن کے مطابق اس وقت پیٹرولیم مصنوعات یعنی کہ پیٹرول، ڈیزل، مٹی کے تیل یا لائٹ ڈیزل آئل کی فروخت سے کوئی بھی سیلز ٹیکس وصول نہیں کیا جا رہا البتہ پیٹرول اور ڈیزل سے فی لیٹر 60 روپے پیٹرولیم لیوی جبکہ مٹی کے تیل سے 5 پیسے پیٹرولیم لیوی کی مد میں وصول کیے جا رہے ہیں۔
