اسپیکر قومی اسمبلی سردار ایاز صادق نے ایوان کی کارروائی چلانے کے لیے حکومتی اور اپوزیشن ارکان پر مشتمل خصوصی کمیٹی تشکیل دے دی ہے۔
قومی اسمبلی سیکریٹریٹ کے مطابق، اسپیکر قومی اسمبلی سردار ایاز صادق نے قومی اسمبلی کے قواعد و ضوابط اور کارروائی کے طریقہ کار 2007 کے قاعدہ 244 (B) کے تحت قومی اسمبلی کے 11 ستمبر 2024 کے اجلاس میں منظور کی گئی تحریک کی تناظر میں خصوصی کمیٹی تشکیل دے دی ہے۔
یہ بھی پڑھیں: چارٹر آف پارلیمنٹ، ایوان کی کارروائی چلانے کے لیے 16 رکنی کمیٹی کے قیام کی قرارداد متفقہ طور پر منظور
کمیٹی پارلیمان، اراکین پارلیمنٹ، آئین، قومی اسمبلی میں قواعد و ضوابط اورکارروائی کے طریقہ کار 2007 اور قومی اسمبلی کی کارروائی کو مؤثر طریقے سے چلانے سے متعلق امور کو زیرغور لا کر سفارشات مرتب کرے گی۔
Special Committee 11sep by Syed Awad
کمیٹی وفاقی وزرا اور اراکین قومی اسمبلی پر مشتمل ہوگی، اس کمیٹی میں شامل وفاقی وزرا سینیٹر اسحاق ڈار، خواجہ محمد آصف، ڈاکٹر خالد مقبول صدیقی، چوہدری سالک حسین اور عبدالعلیم خان ہوں گے۔
یہ بھی پڑھیں: پی ٹی آئی کے اراکین پارلیمنٹ کی گرفتاری، سینیئر پارلیمانی رہنما کیا کہتے ہیں؟
اراکین قومی اسمبلی سید خورشید احمد شاہ، سید نوید قمر، سید امین الحق، محمد اعجاز الحق، خالد حسین مگسی، مسٹر پولین، صاحبزادہ محمد حامد رضا، گوہر علی خان، محترمہ شاہدہ بیگم، محمد اختر مینگل، حمید حسین، محمود خان اچکزئی بھی کمیٹی کا حصہ ہوں گے۔ وزیر پارلیمانی امور کمیٹی کے ایکس آفیشو ممبر ہوں گے۔
واضح رہے کہ گزشتہ روز قومی اسمبلی کے اجلاس کے دوران اسپیکر سردار ایاز صادق نے ایوان کی کارروائی چلانے کے لیے چارٹر آف پارلیمنٹ کی تجویز پیش کی تھی، جس کے بعد ایوان نے 16 رکنی کمیٹی کے قیام کی قرارداد متفقہ طور پر منظور کی تھی۔
