بھارتی ادارے ہورون انڈیا نے بھارت کی امیر ترین شخصیات کی فہرست جاری کردی ہے جس میں یہ بات سامنے آئی ہے کہ بھارت میں امیر ترین افراد کی تعداد میں تیزی سے اضافہ ہورہا ہے جس میں بالی ووڈ کے کئی فنکار بھی شامل ہیں۔
ہورون انڈیا رچ لسٹ 2024 کے مطابق بھارت میں ایک ہزار 539 افراد ایسے ہیں جن کے پاس ہزار کروڑ سے زائد کے اثاثے ہیں جبکہ گزشتہ سال کے مقابلے میں رواں سال 220 مزید بھارتی شہری امیر ترین افراد کی فہرست میں شامل ہوئے ہیں۔
یہ بھی پڑھیں: سلمان خان کے کُل اثاثے منظرِ عام پر آگئے، اداکار کے پاس کیا کچھ ہے؟
فہرست کے مطابق بالی ووڈ کنگ شاہ رخ خان بھارت کے سب سے امیر ترین اداکار ہیں جن کے کُل اثاثوں کی مالیت 7300 کروڑ بھارتی روپے ہے جبکہ امیر ترین اداکارہ کے نام نے سب کو حیران کردیا ہے کیونکہ وہ اداکارہ نہ تو ایشوریا رائے ہیں، نہ پریانکا چوپڑا، نہ دیپیکا پڈوکون اور نہ ہی عالیہ بھٹ بلکہ وہ ماضی کی مقبول ترین بالی ووڈ اداکارہ جوہی چاولہ ہیں جو 4 ہزار 600 کروڑ بھارتی روپے کے اثاثوں کی مالک ہیں۔
واضح رہے کہ جوہی چاولہ کے علاوہ کوئی دوسری بھارتی اداکارہ 1000 کروڑ کلب میں شامل نہیں ہے۔ 90 کی دہائی سے فلمی کیریئر کا آغاز کرنے والی جوہی چاولہ نے متعدد ہٹ فلموں میں کام کیا ہے۔ جوہی چاولہ نے 1995 میں بھارتی صنعت کار جے مہتا سے شادی کی تھی جن سے اب ان کے 2 بچے، ایک بیٹا اور ایک بیٹی ہے۔
جوہی چاولہ شاہ رخ خان کی کمپنی ریڈ چلی انٹرٹینمنٹ میں پارٹنر ہیں اور آئی پی ایل کی امیر ترین ٹیم کلکتہ نائٹ رائیڈرز کی شریک مالک بھی ہیں۔
