پاکستان تحریک انصاف (پی ٹی آئی) کے سینیئر رہنما شیر افضل مروت نے کہا ہے کہ ہمارے کچھ ایم این ایز حکمرانوں کی گود میں جاکر بیٹھ گئے، ان کے حوالے سے پارٹی جلد فیصلہ کرےگی۔
رہائی کے بعد میڈیا سے گفتگو کرتے ہوئے انہوں نے کہاکہ حکومت نے ہمارے 5 ایم این ایز کو اغوا کرکے پنجاب ہاؤس میں رکھا ہے، جبکہ 2 ایم این ایز بیرون ملک تھے، جن کو کہا گیا کہ واپس نہ آؤ لیکن وہ پھر بھی آگئے۔
منع کرنے کے باوجود پی ٹی آئی ممبران پاکستان ائے۔شیر افضل۔
بلکل ٹھیک کہہ رہا ہے کچھ ممبران کو روکا تھا آئینی ترمیم ا رہی ہے آپ نے بلکل بھی پاکستان نہیں انا لیکن وہ پاکستان ائے اور پھر لاپتہ۔— Arslan Baloch (@balochi5252) September 16, 2024
شیر افضل مروت نے کہاکہ لگتا ہے کہ انہوں نے کمٹمنٹ کی ہوئی تھی، لیکن پارٹی جلد اس حوالے سے فیصلہ کرے گی، کیونکہ عمر ایوب نے پہلے ہی ہدایات کی ہوئی تھیں کی سارے لوگ روپوش ہوجائیں۔
انہوں نے کہاکہ اس وقت ایوان مکمل ہی نہیں، اس لیے آئینی ترمیم کی کوئی حیثیت نہیں ہوگی۔
شیر افضل مروت نے کہاکہ پی ٹی آئی کو مخصوص نشستیں نہیں دی جارہیں، جبکہ خیبرپختونخوا اسمبلی نے سینیٹرز کا انتخاب ابھی تک نہیں کیا۔
انہوں نے کہاکہ فارم 47 پر جو لوگ منتخب ہوکر آئے ہیں ان کو آئینی ترمیم کے لیے ووٹ دینے کا کوئی حق نہیں۔
شیر افضل مروت نے مزید کہاکہ پولیس نے ہم پر جو الزامات لگائے ہیں وہ ثابت کرے، ورنہ میں آئی جی اسلام آباد کے خلاف 193 کا استغاثہ دائر کرنے جارہا ہوں۔
