بالی ووڈ کی بیبو کرینہ کپور کو فلم انڈسٹری میں 25 سال ہوگئے ہیں لیکن آج بھی ان کا شمار بھارتی فلم انڈسٹری کی خوبصورت اور مصروف ترین اداکاراؤں میں ہوتا ہے۔ سال 2000 میں فلم ’ریفیوجی‘ سے اپنے کیریئر کا آغاز کرنے والی کرینہ کپور کی رواں برس اب تک 2 فلمیں ریلیز ہوچکی ہیں جن میں ’کریو‘ اور ’دی بکنگھم مرڈرز‘ شامل ہیں، اور اب خبریں آرہی ہیں کہ کرینہ کپور کو بالی ووڈ کی ایک بڑی فلم میں کام کرنے کی آفر ہوئی ہے۔
بھارتی میڈیا کے مطابق، کرینہ کپور کو گزشتہ 9 ماہ کے دوران تاریخی واقعات پر مبنی یا زمانہ قدیم کی عکاسی کرتی فلموں میں متعدد ہائی پروفائل رول آفر کیے گئے، تاہم کرینہ نے اب ایک ایسی فلم کے لیے ہامی بھری ہے جس کے بارے میں کہا جارہا ہے کہ وہ اگلے 2 سال تک انڈین فلم انڈسٹری کا اہم ترین پروجیکٹ ہوگا۔
یہ بھی پڑھیں: کرینہ کپور کی نئی فلم ’بکنگھم مرڈرز‘ کا دلچسپ ٹریلر جاری
کرینہ کے یہ فلم سائن کرنے سے متعلق ذرائع کا کہنا ہے کہ اس فلم میں کرینہ کو ایک ایسا رول ملا ہے جو انہوں نے آج تک نہیں کیا اور اس فلم کے ڈائریکٹر انڈین فلم انڈسٹری کی جانی مانی شخصیت ہیں، کرینہ نے اس فلم کے لیے فوراً ہامی بھری ہے کیونکہ اس فلم میں ان کا رول کسی چیلینج سے کم نہیں ہے۔
کرینہ کے بارے میں کہا جاتا ہے کہ وہ عام طور پر کسی فلم کو سائن کرنے سے پہلے وقت لیتی ہیں اور اس کے بارے میں اچھا خاصا سوچتی ہیں، لیکن جب انہیں اس فلم کی آفر ہوئی تو فلم کی کہانی اور ڈائریکٹر کے وژن سے متاثر ہوکر انہوں نے پلک جھپکتے ہی یہ فلم کرنے کی ہامی بھرلی تھی۔
یہ بھی پڑھیں: ٹاپ اور فلاپ اداکاروں کا تعین کون کرتا ہے؟ کرینہ کپور نے سب بتادیا
اس فلم اور اس کے ڈائریکٹر کا نام ابھی سامنے نہیں آیا ہے لیکن اطلاعات ہیں کہ اس فلم کی پروڈکشن جنوری 2025 میں شروع ہوجائے گی، اس فلم کی شوٹنگ اندرون اور بیرون ملک کی جائے گی، جبکہ کرینہ نے اس فلم کے لیے اپنا پورے سال کا شیڈول بھی کلیئر کرلیا ہے۔
