شہریوں کی حفاظت کی دعویدار کراچی پولیس کے اہلکار ایک بار پھر خود لٹ گئے۔ ڈاکوؤں نے سپر ہائی وے پر پولیس افسر اور اہلکار کو تشدد کا نشانہ بنایا اور ان سے سرکاری اسلحہ اور موبائل فون چھین کر فرار ہوگئے۔
پولیس کے مطابق، گزشتہ شب سب انسپکٹر شہزاد حسین اورکانسٹیبل ذاکر حسین ایم نائن موٹر وے پر ڈیوٹی کرکے واپس لوٹ رہے تھے۔ پولیس پارٹی میں شامل خاتون ہیڈ کانسٹیبل اپنی کار میں روانہ ہوئی، جبکہ مرد پولیس افسر اور اہلکار موٹرسائیکل پر روانہ ہوئے، ایم نائن موٹر وے حیدر آباد سے کراچی ٹریک پر رویندہ روڈ کے قریب پہنچے تو 3 ملزم آگئے۔
یہ بھی پڑھیں: کیا کراچی پولیس ’انکاؤنٹر اسپیشلسٹ‘ بنتی جارہی ہے؟
متاثرہ پولیس افسر کے مطابق، ملزموں نے اپنے ہتھیار لوڈ کرکے ہمارے سروں پر لگائے اور بائیک رکوا کر ہماری مکمل تلاشی لی، ملزموں نے ہم سے سرکاری نائن ایم ایم پستول، موبائل فونز، دستاویزات اور نقدی چھین لی، کانسٹیبل نے ملزموں کو پکڑنے کی کوشش کی تو انہوں نے ہمارے سروں پر کئی بار بٹ مارے اور زخمی کرکے فرار ہوگئے۔ واقعہ کا مقدمہ تھانہ گڈاپ سٹی میں درج کر لیا گیا ہے۔
