پاکستان میں تعینات ناروے کے سفیر پَرالبرٹ الساس کہتے ہیں کہ پاکستان میں جمہوری عمل کا پروان چڑھنا ملکی اقتصادی اور معاشی صورتحال کیلئے اہم ہے۔
نارویجیئن سفیر نے لاہور میں سابق وزیراعلٰی پنجاب و مرکزی صدر پاکستان تحریک انصاف چوہدری پرویزالٰہی سے لاہورمیں ان کی رہائش گاہ پر ملاقات کے دوران دونوں ممالک کے درمیان باہمی تعلق، تجارت سمیت موجودہ ملکی سیاسی صورتحال پر تبادلہ خیال کیا۔
نارویجیئن سفیرپَرالبرٹ الساس کے مطابق ناروے پاکستان میں جمہوری عمل کی حمایت کرتا ہے اور ملک میں آئین کی پاسداری کو مقدم رکھتے ہوئے صاف اور شفاف انتخابات کا حامی ہے۔
پرویز الٰہی کا کہنا تھا کہ سمندر پار پاکستانیوں کے ووٹ ناروے کے وزیراعظم اور اوسلو کے میئر کیلئے بڑی اہمیت کے حامل ہیں۔ ناروے اور پاکستان کے درمیان تجارت اور دوستانہ تعلقات کو مزید فروغ دینے کی ضرورت ہے۔
’دو بار ناروے کے وزیراعظم اور اوسلو کے میئر میری دعوت پر پاکستان آچکے ہیں۔ ناروے میں مقیم منڈی بہاؤ الدین اور گجرات سے تعلق رکھنے والے بڑی تعداد میں پاکستانی ناروے کی ترقی میں اپنا اہم کردار ادا کرر ہے ہیں۔‘
