شیوہ شمالی وزیرستان میں ماڑی پیٹرولیم کمپنی کا چارٹرڈ ہیلی کاپٹر گر کر تباہ ہوگیا۔ جس کے نتیجے میں 6 مسافر جاں بحق، 8 زخمی ہوگئے۔
ماڑی پیٹرولیم ذرائع کے مطابق ہیلی کاپٹر شیوہ آئل فیلڈ کے نزدیک اڑان بھرتے ہی تکنیکی خرابی کی وجہ سے کریش کر گیا۔ ایم آئی 8 ہیلی کاپٹر میں 3 غیر ملکی روسی پائلٹس اور کریو سمیت 14 مسافر سوار تھے۔
ذرائع نے بتایا کہ حادثے میں 6 افراد جاں بحق اور 8 افراد زخمی ہوئے ہیں۔ زخمیوں کو جائے حادثہ سے سی ایم ایچ تھل پہنچا دیا گیا ہے جبکہ تھل سے زخمیوں کو بذریعہ ہیلی کاپٹر منتقل کیا جا رہا ہے۔
ذرائع کا کہنا ہے کہ حادثہ انجن کے فیل ہونے کی وجہ سے ہوا – کسی بھی قسم کی تخریب کاری کے شواہد نہیں ملے۔ ہیلی کاپٹر میں اڑان بھرتے ہی تکنیکی فالٹ ہوا۔ ایمرجنسی لینڈنگ کرتے ہُوئے ہیلی کاپٹر کا ٹیل روٹر زمین سے ٹکرا گیا۔
حادثے کی تحقیقات شروع کر دی گئی ہیں۔
