ملائشیا نے پاکستانی حلال گوشت کی برآمدات کا عمل آسان بنانے کی یقین دہانی کرائی ہے۔
ترجمان وزارت تجارت کے مطابق، وفاقی وزیر تجارت جام کمال خان سے ملائشین ہم منصب ظفرالعزیز نے ملاقات کی اور دوطرفہ تجارت کے فروغ سے متعلقہ امور پر تبادلہ خیال کیا۔
یہ بھی پڑھیں: ملائیشیا کے وزیر اعظم 3 روزہ دورے پر 2 اکتوبر کو پاکستان پہنچیں گے، دفتر خارجہ
پاکستان اور ملائیشیا کے درمیان تجارتی تعلقات کو مزید فروغ دینے سے متعلقہ اس اہم ملاقات میں وفاقی وزیر تجارت جام کمال خان نے پاکستانی چاول اور حلال گوشت کی ملائیشیا کو برآمدات بڑھانے پر زور دیا اور کہا کہ پاکستان اور ملائیشیا کے درمیان کاروباری روابط مزید مضبوط بنانے کی ضرورت ہے۔
ملائیشیا کے وزیر تجارت نے وفاقی وزیر جام کمال خان کو پاکستانی حلال گوشت کی برآمدات کے عمل کو آسان بنانے کی یقین دہانی کروائی۔ اس موقع پر جام کمال خان نے ملائیشیا کو چاول کی خریداری میں دلچسپی ظاہر کرنے کی دعوت بھی دی۔
ملاقات کے دوران وفاقی وزیر جام کمال خان نے پاکستان کی جانب سے کاروباری اور سرمایہ کاری کے ماحول کو بہتر بنانے کے عزم کا اظہار کیا۔ ملائیشین وزیر تجارت نے بھی پاکستانی برآمد کنندگان کو سہولت دینے کے لیے جاکم کے عمل کو آسان بنانے کا یقین دلایا۔
یہ بھی پڑھیں: ملائشیا کے وزیراعظم کی آمد، پی ٹی آئی کا احتجاج: 4 اکتوبر کو اسلام آباد کے تعلیمی ادارے بند رہیں گے؟
وزیر تجارت جام کمال خان نے ملائیشیا کے ساتھ تجارتی تعلقات کو نئی بلندیوں تک لے جانے کے عزم کا اظہار کیا اور ملائشین ہم منصب کے ساتھ دونوں ملکوں کے درمیان حلال گوشت کی تجارت میں اضافے کے امکانات پر تبادلہ خیال کیا۔
واضح رہے کہ گزشتہ روز ملائشیا کے وزیراعظم داتو سری انور ابراہیم اعلی سطح کی کاروباری شخصیات و سرمایہ کاروں کے وفد کے ہمراہ پاکستان پہنچے تھے اور وزیراعظم شہباز شریف نے ان کا نور خان ایئر بیس پر پرتپاک استقبال کیا تھا۔ اس دورے کے دوران دو طرفہ تعاون کے فروغ پر گفتگو اور دونوں ممالک کے مابین شراکت کے حوالے سے اہم پیشرفت کی توقع کی جارہی ہے۔ ملائیشیا کے وزیراعظم داتو سری انور ابراہیم دورے کے دوران صدر مملکت آصف زرداری اور وزیراعظم شہبازشریف سے ون ٹو ون ملاقاتیں کریں گے۔
