پاکستان اور انگلینڈ کے درمیان پہلے ٹیسٹ کے دوسرے روز پاکستان کے 556 رنز آل آؤٹ کے جواب میں مہمان ٹیم نے اپنی پہلی اننگز میں دن کے اختتام تک ایک وکٹ کے نقصان پر 96 رنز بنائے۔
3 میچوں کی ٹیسٹ سیریز کا یہ پہلا میچ ملتان میں کھیلا جا رہا ہے جس کے دوسرے روز پاکستان کی پوری ٹیم 556 رنز بناکر آؤٹ ہوگئی تھی۔
اولی پوپ صفر کے اسکور پر آؤٹ ہوئے جبکہ زیک کرولی اور جو روٹ ابھی وکٹ پر موجود ہیں اور دونوں نے بالترتیب 64 اور 32 رنز بنائے ہیں۔ پاکستان کی جانب سے اب تک کی واحد وکٹ نسیم شاہ نے حاصل کی ہے۔ انہوں نے کل 7 اوورز میں 29 رنز دے کر ایک کھلاڑی پویلین واپس بھیجا ہے۔
قبل ازیں پاکستان کی پہلی اننگز میں سب سے زیادہ اسکور کپتان شان مسعود کا رہا جنہوں نے 151 رنز بنائے جبکہ عبداللہ شفیق اور سلمان عل آغا نے بھی شاندار سینچریاں اسکور کیں۔
دوسرے دن کا آغاز پاکستان نے 4 وکٹوں کے نقصان پر 328 رنز سے کیا تھا۔
دن کا آغاز ہوا تو سعود شکیل اور نسیم شاہ نے ذمہ داری سے کھیلتے ہوئے عمدہ شراکت داری قائم کی، اس دوران سعود شکیل بھی اپنی نصف سینچری بنانے میں کامیاب رہے تاہم نسیم شاہ 388 کے مجموعی اسکور پر برائیڈن کارس کی گیند پر ہیری بروک کے ہاتھوں کیچ آؤٹ ہوگئے، انہوں نے 81 گیندوں پر 33 رنز بنائے۔ نسیم شاہ کے بعد محمد رضوان کھیلنے آئے مگر وہ بغیر کوئی اسکور بنائے جیک لیچ کی گیند پر کرس ووکس کے ہاتھوں کیچ آؤٹ ہوگئے۔
اس نقصان کے بعد سعود شکیل اور سلمان علی آغا کے درمیان ساتویں وکٹ کے لیے 57 رنز کی شراکت داری قائم ہوئی اور 450 کے مجموعی اسکور پر سعود شکیل 82 رنز بناکر آؤٹ ہوگئے۔ ان کے بعد عامر جمال بیٹنگ کے لیے آئے تاہم وہ بھی زیادہ دیر وکٹ پر نہ ٹھہر سکے اور جب ٹیم کا اسکور 464 تک پہنچا تو عامر 7 رنز بناکر وکٹ دے بیٹھے۔
تاہم سلمان آغا نے شاندار سینچری اسکور کرکے پاکستان کو 556 رنز تک پہنچا دیا ہے۔ یہ اس اننگ کی تیسری سینچری رہی، اس سے قبل گزشتہ روز کپتان شان مسعود اور اوپنر عبداللہ شفیق بھی سینچری مکمل کرچکے تھے۔
میچ کے پہلے دن پاکستان نے پہلے بیٹنگ کرتے ہوئے 4 وکٹوں کے نقصان پر 328 رنز بنائے تھے۔ قومی ٹیم کی جانب سے شان مسعود نے 151 رنز بنائے تھے اور عبداللہ شفیق نے 102 رنز کی اننگز کھیلی تھی۔
پاکستان اور انگلینڈ کے درمیان ٹیسٹ سیریز کے پہلے میچ میں قومی ٹیم کے کپتان شان مسعود نے ٹاس جیت کر پہلے بیٹنگ کا فیصلہ کیا۔ قومی ٹیم کی جانب سے صائم ایوب اور عبداللہ شفیق نے اننگز کا آغاز کیا لیکن صائم ایوب 8 کے مجموعی اسکور پر 4 اسکور بنا کر آؤٹ ہوگئے۔
یہ بھی پڑھیں: پہلا ٹیسٹ: انگلینڈ کیخلاف پاکستان کی پلیئنگ الیون کا اعلان، عامر جمال کی شمولیت
اس کے بعد عبداللہ شفیق اور شان مسعود نے ذمہ دارانہ بیٹنگ کی، کپتان شان مسعود نے 2 چھکے اور 10 چوکے چڑ کر سینچری مکمل کی۔
دوسری جانب عبداللہ شفیق 102 رنز بنا کر آؤٹ ہوئے، دونوں کھلاڑیوں کے درمیان 253 رنز کی پارٹنر شپ ہوئی۔
پہلے روز کا کھیل ختم ہونے سے کچھ دیر قبل بابر اعظم 30 رنز بنا کر آؤٹ ہوگئے، جبکہ سعود شکیل اور نسیم شاہ بغیر کریز پر موجود تھے۔ انگلینڈ کی جانب سے گس ایٹکنسن نے 2 کھلاڑیوں کو آؤٹ کیا، جبکہ کرس ووکس ایک وکٹ حاصل کرنے میں کامیاب رہے۔
پاکستان پلیئنگ الیون
فائنل الیون میں کپتان شان مسعود، سعود شکیل، بابر اعظم، صائم ایوب اور عبداللّٰہ شفیق ٹیم شامل ہیں۔ محمد رضوان، سلمان علی آغا اور عامر جمال بھی پلیئنگ الیون کا حصہ ہیں۔ شاہین آفریدی، نسیم شاہ اور ابرار احمد ٹیم میں موجود ہیں۔
انگلینڈ پلیئنگ الیون
انگلینڈ کی پلیئنگ الیون میں جیک لیچ اور زیک کرولی کا نام بھی شامل ہے۔ تاہم، دونوں کھلاڑیوں کی بہت دیر کے بعد ٹیم میں واپسی ہوئی ہے۔ ملتان ٹیسٹ میچ کے لیے انگلینڈ کی پلئینگ الیون میں کپتان اولی پوپ، زیک کرولی، بین ڈکٹ، جو روٹ، ہیری بروک، جیمی اسمتھ، کرس ووکس، گس ایٹکنسن، برائیڈن کارس، جیک لیچ اور شعیب بشیر شامل ہیں۔
یہ بھی پڑھیں: انگلینڈ پاکستان کو آسان حریف سمجھنے کی غلطی نہ کرے، ناصر حسین نے خبردار کردیا
پاکستان اور انگلینڈ کے مابین ٹیسٹ سیریز کے پہلے 2 میچز ملتان میں 7 سے 11 اکتوبر اور 15 سے 19 اکتوبر کو کھیلے جائیں گے۔ سیریز کا تیسرا ٹیسٹ میچ 24 سے 28 اکتوبر تک راولپنڈی کرکٹ اسٹیڈیم میں کھیلا جائے گا۔
