وفاقی وزیر خزانہ محمد اورنگزیب نے کہا ہے کہ معاشی استحکام کے لیے اقدامات کے ثمرات آنا شروع ہوگئے ہیں، آنے والے دنوں میں شرح سود میں مزید کمی آئے گی۔
اسلام آباد میں میڈیا سے گفتگو کرتے ہوئے انہوں نے کہاکہ ملک میں مہنگائی کی شرح میں کمی آئی ہے جبکہ مزید کمی آئے گی۔
یہ بھی پڑھیں کوئی منی بجٹ نہیں آئے گا تاہم نان فائلرزپالیسی مزید سخت کردی ہے، وزیر خزانہ
انہوں نے کہاکہ اقتصادی ڈھانچے میں اصلاحات کا عمل شروع ہوچکا ہے، کاروبار بند ہونے سے معیشت کو ناقابل تلافی نقصان ہوتا ہے۔
انہوں نے مزید کہاکہ بڑی محنت سے معیشت کو مستحکم کیا، ملک ایک دن بند ہونے سے 190 ارب روپے کا نقصان ہوتا ہے۔
وزیر خزانہ نے کہاکہ اسلام آباد میں احتجاج سے 8 لاکھ افراد متاثر ہوئے، ہڑتالوں کے ملکی معیشت پر گہرے اثرات مرتب ہوتے ہیں۔
انہوں نے کہاکہ جو لوگ ہڑتال کی کال دیتے ہیں ان کو بھی سوچنا چاہیے، اور بات چیت سے مسئلے کا حل نکالنا چاہیے۔
محمد اورنگزیب نے کہاکہ دہشتگردی کی وجہ سے بھی معیشت کو نقصان پہنچتا ہے، دو روز قبل کراچی میں چینی شہریوں کو نشانہ بنایا گیا جو قابل مذمت ہے۔
انہوں نے کہاکہ کراچی میں جن چینی انجینیئرز پر حملہ کیا گیا وہ چینی آئی پی پی سے منسلک تھے اور ہمارے ان سے مذاکرات چل رہے تھے۔
وزیر خزانہ نے کہاکہ انہی چینی انجینئرز سے ٹیرف میں کمی کے لیے قرض کی ری پروفائلنگ پر بات ہورہی تھی، اور ہمیں مثبت جواب ملا تھا۔
یہ بھی پڑھیں آئی ایم ایف کا آخری پروگرام ہوگا، صوبے ذمہ داری نبھائیں اور مہنگائی کنٹرول کریں، وزیرخزانہ
وزیر خزانہ نے کہاکہ ہمیں کوئی ایسا قدم نہیں اٹھانا چاہیے جس سے ملکی معیشت کو نقصان پہنچے۔
