سمندری طوفان ملٹن امریکی ریاست فلوریڈا کے ساحل پر خلیج میں واقع ٹیمپا بے سے ٹکرا گیا ہے۔
یہ بھی پڑھیں: چین میں سمندری طوفان گاایمی کی تباہ کاریاں، 12 افراد ہلاک، جیانگ کے ڈپٹی میئر لاپتا
وائس آف امریکا کی رپورٹ کے مطابق حکام نے ابتدائی طور پر اس کو کیٹیگری تھری کا طوفان قرار دیا ہے۔ فلوریڈا کے ساحلی علاقوں میں لگ بھگ 160 کلو میٹر کی انتہائی تیز ہوائیں چل رہی ہیں جب کہ تیز بارش کا سلسلہ بھی شروع ہو چکا ہے۔
امریکا میں طوفانوں پر نظر رکھنے والے سرکاری ادارے ’نیشنل ہریکین سینٹر‘کا کہنا ہے کہ بدھ کی شب مقامی وقت کے مطابق ساڑھے 8 بجے ریاست فلوریڈا کے ساحلی علاقے سیستاکے سے جس وقت طوفان ٹکرایا تو وہاں 200 کلومیٹر فی گھنٹہ سے بھی زیادہ تیز ہوائیں چل رہی تھیں۔
سیستاکے فلوریڈا کے علاقے ٹیمپا کے جنوب میں واقع سفید ریت کا مشہور ساحل ہے۔ اس ساحلی پٹی پر تقریباً ساڑھے پانچ ہزار افراد آباد ہیں جنہیں انتہائی خوش حال آبادی بھی قرار دیا جاتا ہے۔
15 لاکھ شہری بجلی سے محروم
ملٹن کے دوران انتہائی تیز ہواؤں کے باعث بجلی کا نظام شدید متاثر ہوا ہے۔ حکام کے مطابق بدھ کی شب سے ریاست بھر میں لگ بھگ 15 لاکھ افراد بجلی سے محروم ہو چکے ہیں۔
مزید پڑھیے: آسمانی بجلی گرنے کے واقعات میں کیوں اضافہ ہو رہا ہے؟
فلوریڈا سے طوفان ٹکرانے سے قبل متعدد علاقوں میں ہوا کے تیز بگولے بھی نقصانات کا سبب بنے۔ طوفانی بگولوں سے بعض علاقوں میں شہریوں کی اموات کی بھی اطلاعات ہیں۔ تاہم ابھی سرکاری طور پر اس کی باقاعدہ تصدیق نہیں کی گئی۔
صدی کا سب سے خطرناک طوفان
نیشنل ہیریکین سینٹر کا کہنا ہے کہ فلوریڈا کے مغرب اور مرکزی علاقوں کے لیے ملٹن سب سے زیادہ تباہ کن سمندری طوفانوں میں سے ایک ہوسکتا ہے۔
3 Tornadoes drop at the same time
It's unbelievably shocking & scary to see#HurricaneMilton #Helene#Milton #Milton2024 #miltonhurricane #Hurricane #tornadoes #Florida #Georgia #NorthCarolina #FEMA #WeatherAdvisory #FortMyers #Naples #Sarasota #TampaBay #DeSantis #BREAKING pic.twitter.com/Jrg3AmAUzD
— UNITY FRONTLINE (@UnityFrontLine) October 9, 2024
فلوریڈا کے علاقے ٹیمپا بے سے گزشتہ ایک صدی میں براہِ راست کوئی بھی طوفان نہیں ٹکرایا تھا لیکن اب طوفان ملٹن اس علاقے میں تباہی کا سبب بن رہا ہے۔ طوفان سے ٹیمپا بے کے گنجان آباد علاقے سینٹ بیٹرزبرگ، سراسوتا اور میئرز سمیت دیگر آبادیاں متاثر ہو رہی ہیں۔
ٹیمپا بے میں تقریباً 33 لاکھ کے قریب افراد آباد ہیں جنہیں حکام کی جانب سے انخلا کی ہدایت کی گئی تھی۔
مزید پڑھیں: امریکا میں طوفان سے بڑی تباہی، 23 افراد ہلاک، متعدد عمارتیں اور گھر تباہ
امریکا کے ’نیشنل ویدر سروس‘ نے کہا ہے کہ سینٹ پیٹرزبرگ سمیت ٹیمپا بے کے متعدد علاقوں میں سیلابی صورتِ حال ہے اور یہاں 16 انچ (400 ملی میٹرز) بارش ہو چکی ہے۔
ریاست فلوریڈا میں طوفانی بارشوں کی وجہ سے دریاؤں اور جھیلوں میں سیلابی صورت حال کا اندیشہ ظاہر کیا جا رہا ہے۔
طوفان کے فلوریڈا سے مکمل طور پر ٹکرانے سے قبل ہی لگ بھگ 150 گھروں کے تباہ ہونے کی رپورٹس سامنے آ چکی ہیں۔
یاد رہے کہ ملٹن طوفان سے محض 2 ہفتے قبل فلوریڈا میں ہیلین طوفان ٹکرایا تھا جس کی وجہ سے 230 افراد ہلاک ہوگئے تھے۔
