جنسی ہراسگی اور بلیک میلنگ میں ملوث پاکستانی نژاد برطانوی شہری کو 7 سال قید اور ڈیڑھ لاکھ روپے جرمانے کی سزا سنادی گئی ہے۔
ملزم اشفاق خلیل نے خاتون کی قابل اعتراض تصاویر اور ویڈیوز نہ صرف سوشل میڈیا پر شیئر کی تھیں بلکہ قابل اعتراض مواد شکایت کنندہ خاتون کے خاندان کو بھی بھیج کر بلیک میل کررہا تھا۔
مقدمے کی سماعت مکمل ہونے پر پریوینشن آف الیکٹرونک کرائمز کورٹ اسلام آباد کے اسپیشل جج محمد اعظم خان نے اشفاق خلیل کو مجرم قرار دیتے ہوئے 7 سال قید اور ڈیڑھ لاکھ روپے جرمانے کی سزا سنائی۔
جہلم سے تعلق رکھنے والے اس برطانوی شہری کے خلاف ایف آئی اے کے سائبر کرائم سرکل اسلام آباد نے متاثرہ خاتون کی درخواست پر مقدمہ درج کرتے ہوئے جون 2022 میں ملزم کو گرفتار کیا تھا۔
مقدمہ میں ایف آئی اے کی تفتیشی افسر سب انسپیکٹر ہانیہ خلیل نے مقدمے کی تفتیش مکمل کر عدالت میں چالان جمع کروایا جس کے بعد اسلام آباد ہائیکورٹ سے بھی ملزم کی ضمانت مسترد ہوئی تھی۔
