وزیر اعلیٰ سندھ مراد علی شاہ نے ارجنٹائن کی فٹبال ٹیم کو کراچی کے علاقے لیاری کے دورے کی دعوت دی ہے، جو نہ صرف فٹبال بلکہ یہاں کے کھلاڑی اور اسپورٹس شائقین ارجنٹائن سمیت جنوبی امریکا کی فٹبال ٹیموں سے گہری وابستگی کے لیے بھی مشہور ہیں۔
ارجنٹائن کے سفیر سیباسشیئن سیوس سے ملاقات میں سندھ اور ارجنٹائن کے درمیان دوطرفہ تعلقات کو مضبوط بنانے پر تبادلہ خیال کیا گیا۔ وزیر اعلیٰ کے ترجمان کے مطابق اس بات پر اتفاق کیا گیا کہ ارجنٹائن کے سرمایہ کار متعلقہ محکموں سے رابطے کے لیے جلد سندھ کا دورہ کریں گے۔
یہ بھی پڑھیں:تیسری بار وزیر اعلیٰ سندھ منتخب ہونے والے مراد علی شاہ کون ہیں؟
وزیراعلیٰ سندھ نے کراچی کے پانی کے منصوبوں میں سرمایہ کاری کے منافع بخش مواقع پر روشنی ڈالی، انہوں نے بتایا کہ سندھ حکومت نے کھارے پانی کو ٹریٹ کرنے کے منصوبوں کے لیے عالمی بینک سے 50 ملین ڈالر حاصل کیے ہیں، انہوں نے نجی سرمایہ کاروں کی حوصلہ افزائی کی کہ وہ شہریوں کی صاف پانی کی فراہمی کے لیے سمندری پانی کو ٹریٹ کرنے میں حصہ لیں۔
ارجینٹینا کے سفیر سیباسشیئن سیوس نے کہا کہ ارجنٹائن کی اسٹاک ایکسچینج سے رجسٹرڈ کمپنیاں سندھ میں سرمایہ کاری کرنے میں، خاص طور پر گوداموں کے قیام میں، دلچسپی رکھتی ہیں، وزیراعلیٰ نے محکمہ سرمایہ کاری، محکمہ خوراک اور محکمہ آبپاشی کو ارجنٹائن کے سفیر کے ساتھ رابطہ کرنے کی ہدایت کی ہے۔
مزید پڑھیں:این ایف سی ایوارڈ پر تحفظات وفاق کے سامنے رکھ دیے، وزیراعلیٰ سندھ
ثقافتی اور کھیلوں کے تعلقات کو فروغ دینے کے ضمن میں، وزیر اعلیٰ سندھ نے ارجنٹائن کی فٹ بال ٹیم کو لیاری کے ککری گراؤنڈ میں مدعو کیا۔ اجلاس کے دوران فیصلہ کیا گیا کہ سرمایہ کاری کے اقدامات کے ساتھ ساتھ سندھ میں ایک فٹ بال ٹیم بھی تیار کی جائے گی جس میں ارجنٹائن کی قومی فٹبال ٹیم کے اہم کھلاڑی لیاری میں تربیتی میچوں میں شرکت کریں گے۔
