وزیراعلیٰ سندھ سید مراد علی شاہ سے ایران کے قونصل جنرل حسن نورین اور وائس قونصل جنرل علی خوشرو کی ملاقات میں کراچی (سندھ) تا چاہ بہار (ایران) کے درمیاں فیری (کشتی) سروس شروع کرنے پر بات چیت ہوئی ہے۔
وزیراعلیٰ سندھ سید مراد علی شاہ نے کہا کہ اگر فیری سروس شروع ہو جاتی ہے تو زائرین اور طلبہ کو سہولت میسر ہوگی۔ ملاقات میں دوطرفہ تعلقات، باہمی دلچسپی کے امور اور تجارت کے فروغ پر بھی بات چیت ہوئی۔ وزیراعلیٰ سندھ نے کہا کہ ایران کے ساتھ ہمارے تاریخی اور ثقافتی تعلقات ہیں، دونوں ممالک میں تعلقات مزید مستحکم اور مضبوط ہو رہے ہیں۔
مزید پڑھیں:وزیراعلیٰ سندھ مراد علی شاہ، نوری آباد پاور پروجیکٹ ریفرنس سے کیسے بری ہوئے؟
سید مراد علی شاہ نے کہا کہ اس وقت دونوں ممالک میں 2 بلین ڈالرز کی تجارت ہے۔ سندھ سے گوشت اور پھل خاص طور پر سندھڑی آم اور لاڑکانو کے امرود ایران برآمد ہو سکتے ہیں۔
ایرانی قونصل جنرل حسن نورین نے کہا کہ ہم چاہتے ہیں کہ دوطرفہ تجارت کو 3 بلین ڈالرز کیا جائے۔ وزیراعلیٰ سندھ اور ایرانی قونصل جنرل کے درمیاں دونوں ممالک کے تجارتی وفود ایکسچینج کرنے پر بھی اتفاق کیا گیا۔
قونصل جنرل نے وزیراعلیٰ سندھ کو آئندہ ماہ نومبر میں منعقد ہونے والے ایران ثقافتی فیسٹیول میں شرکت کرنے کی دعوت بھی دی۔ وزیر داخلہ ضیا النجار، وزیر ورکس علی حسن زرداری، سیکریٹری داخلہ اقبال میمن، سیکریٹری قانون اور دیگر بھی ملاقات میں شریک تھے۔
