انٹرنیشنل کرکٹ کونسل نے ٹیسٹ، ٹی 20 اور ون ڈے انٹرنیشنل کی رینکنگ جاری کردی ہے۔ ٹیسٹ فارمیٹ کے ٹاپ بیٹرز میں کوئی پاکستانی شامل نہیں ہے جبکہ ون ڈے انٹرنیشنل میں بابر اعظم پہلی پوزیشن پر براجمان ہیں۔
آئی سی سی کی جانب سے تازہ ترین رینکنگ کے مطابق ٹیسٹ فارمیٹ میں انگلش بیٹر جو روٹ نے پہلی پوزیشن مزید مستحکم کرلی، وہ 917 پوائنٹس کے ساتھ ٹاپ پر موجود ہیں۔
نیوزی لینڈ کے کین ولیمسن دوسرے، ہیری بروک ایک درجہ تنزلی کے بعد تیسرے، یشسوی جیسوال چوتھی پوزیشن پر قابض ہیں۔
ٹیسٹ رینکنگ میں پاکستان کے بابراعظم 4 درجہ تنزلی کے بعد 19ویں، محمد رضوان 2 درجہ تنزلی کے بعد 21ویں جبکہ سعود شکیل 7 درجہ تنزلی کے ساتھ 27ویں نمبر پر چلے گئے۔ آغا سلمان کیرئیر کی ٹاپ رینکنگ حاصل کرنے میں کامیاب ہوگئے وہ 8 درجہ ترقی پاکر 14ویں نمبر پر آگئے ہیں۔
ون ڈے رینکنگ
ون ڈے رینکنگ میں قومی کرکٹ ٹیم کے سابق کپتان بابر اعظم 824 پوائنٹس کے ساتھ پہلی پوزیشن پر ہیں، بھارت کے روہت شرما 765 پوائنٹس کے ساتھ دوسرے، بھارت کے ہی شبمن گل 763 پوائنٹس کے ساتھ تیسرے اور بھارت ہی کے ویرات کوہلی 746 پوائنٹس کے ساتھ چوتھے نمبر پر ہیں۔
ون ڈے رینکنگ میں فخرالزمان 682 پوائنٹس کے ساتھ نمبر 9 اور امام الحق 672 پوائنٹس کے ساتھ 11ویں نمبر پر ہیں، مذکورہ پاکستانی بیٹرز کے علاوہ کوئی اور قومی بیٹسمین ٹاپ 20 میں شامل نہیں ہے۔
ٹی 20 رینکنگ
ٹی 20 انٹرنیشنل میں آسٹریلیا کے بیٹر ٹریوس ہیڈ 818 پوائنٹس کے ساتھ پہلے، انگلینڈ کے فل سالٹ 800 پوائنٹس کے ساتھ دوسرے، پاکستان کے بابر اعظم 755 پوائنٹس کے ساتھ تیسرے، محمد رضوان 746 پوائنٹس کے ساتھ چوتھے نمبر پر ہیں۔
محمد رضوان اور بابر اعظم کے علاوہ پاکستان کا کوئی بیٹر ٹاپ 20 میں شامل نہیں۔
