وزیراعظم شہباز شریف امیر قطر شیخ تمیم بن حمد الثانی کی دعوت پر 30 اور 31 اکتوبر کو قطر کا سرکاری دورہ کریں گے۔ دوحہ میں وزیراعظم، امیرِ قطر اور قطر کے وزیراعظم اور وزیر خارجہ محمد بن عبدالرحمٰن بن جاسم الثانی سے بھی ملاقات کریں گے۔
ترجمان دفتر خارجہ کے مطابق ملاقات میں تجارت اور سرمایہ کاری بالخصوص اور اس کے ساتھ ساتھ دوطرفہ تعلقات کی تمام جہتوں پر بات کی جائے گی۔ پاکستان میں سرمایہ کاری کے مواقع کے حوالے سے قطر سرمایہ کاری اتھارٹی اور قطر بزنس ایسوسی ایشن کے اعلیٰ سطح وفود بھی وزیر اعظم سے ملاقات کریں گے۔
مزید پڑھیں:قطر کی بلوچستان کے نوجوانوں کو روزگار فراہمی کی یقین دہانی
وزیراعظم ’منظر‘ کے عنوان سے ہونے والی نمائش کا افتتاح بھی کریں گے جس میں پاکستان میں آرٹ اور آرکیٹیکچر کی 1940 سے لے کر ابتک کی تاریخ کا احاطہ کیا گیا ہے۔ نمائش میں پاکستان کے ثقافتی ورثے اور فن تعمیرات کی عکاسی کے ساتھ ساتھ قطر اور پاکستان کے عوام کے درمیان تاریخی رابطوں کو بھی اجاگر کیا جائے گا۔
