امریکی انتخابات میں ریپبلکن امیدوار ڈونلڈ ٹرمپ کی کامیابی پر فلسطین کی مزاحمتی تحریک حماس نے ڈیموکریٹس کی شکست وجوہات پر روشنی ڈالتے ہوئے نو منتخب صدر کو سابقہ دور حکومت کی غلطیوں سے اجتناب برتنے کا مشورہ دے دیا۔
یہ بھی پڑھیں: ری پبلکنز نے میدان مارلیا،یہ حیرت انگیز فتح ہے جو پہلے کسی کو نہیں ملی، ڈونلڈٹرمپ کا کامیابی پر خطاب
انتخابی نتائج پر ردعمل ظاہر کرتے ہوئے حماس کے سینیئر رہنما سمی ابو ظہری نے کہا ہے کہ انتخابات میں ڈیموکریٹک پارٹی کی شکست غزہ پر ان کے مجرمانہ مؤقف کی قیمت ہے۔
ابو ظہری نے کہا کہ ٹرمپ کو ان کے بیانات کے حساب سے جانچا جائے گا کیونکہ انہوں نے کہا تھا وہ بطور امریکی صدر غزہ جنگ کو چند گھنٹوں میں روکیں گے۔
واضح رہے کہ بدھ کو صدارتی انتخابات میں کامیابی پر ڈونلڈ ٹرمپ نے اپنی تقریر میں بھی نئی جنگیں شروع کرنے کے بجائے جاری جنگیں ختم کرنے کا اعلان کیا ہے۔
عہدے دار نے کہا کہ ڈونلڈ ٹرمپ آؤٹ گوئنگ صدر جو بائیڈن کی غلطیوں سے سبق سیکھیں۔
مزید پڑھیے: امریکا کے 47ویں منتخب صدر، ڈونلڈ ٹرمپ کے کیریئر پر ایک نظر
دریں اثنا حماس پولیٹیکل بیورو کے ممبر باسم نعیم نے کہا کہ صیہونی ریاست کی اندھی حمایت ختم ہونی چاہیے کیونکہ یہ حمایت ہمارے لوگوں کے مستقبل اور خطے کی قیمت پر ہوتی ہے۔
واضح رہے کہ امریکی صدارتی انتخابات میں ڈونلڈ ٹرمپ کامیاب ہوچکے ہیں۔ انہوں نے ایک کانٹے دار مقابلے کے بعد ڈیموکریٹ امیدوار کملا ہیرس کو شکست دی۔
ڈونلڈ ٹرمپ امریکا کے 47 ویں صدر منتخب ہوئے ہیں۔ وہ اس سے پہلے سنہ 2016 میں بھی امریکا کے صدر منتخب ہوئے تھے۔
