وزیر دفاع خواجہ آصف نے کہا ہے کہ نومنتخب امریکی صدر ڈونلڈ ٹرمپ عمران خان کی خاطر پاکستان کے ساتھ تعلقات خراب نہیں کریں گے۔
نجی ٹی وی سے گفتگو کرتے ہوئے انہوں نے کہاکہ ابھی ہمیں کچھ وقت انتظار کرلینا چاہیے کہ ٹرمپ اس ایشو پر کیا ایکشن لیتے ہیں، تاہم جس طرح امریکا اپنے مفادات کا تحفظ کرتا ہے پاکستان بھی اپنے مفادات کا تحفظ کرے گا۔
یہ بھی پڑھیں امریکی انتخابات میں ڈونلڈ ٹرمپ کی جیت، نواز شریف کا تبصرے سے گریز
انہوں نے کہاکہ کوئی بھی خود مختار ملک تعلقات کو کاپی پیسٹ نہیں کرسکتا، ڈونلڈ ٹرمپ کا جو کرمنل ریکارڈ ہے اس سے انکار نہیں کیا جاسکتا۔
خواجہ آصف کہاکہ ٹرمپ نے کیپٹل ہل پر حملہ کیا، جبکہ پاکستان میں عمران خان نے جی ایچ کیو پر دھاوا بولا، اور 9 مئی کو فوج میں بغاوت کرانے کی کوشش کی گئی۔
انہوں نے کہاکہ لبنان اور فلسطین میں امریکا کی سربراہی میں جنگ جاری ہے، اگر جنگیں اسی طرح جاری رہیں اور امریکا پشت پناہی کرتا رہا تو اس پر مل جل کر کام نہیں ہوسکتا۔
انہوں نے مزید کہاکہ امریکا میں بھی اسٹیبلشمنٹ کی حکومت ہے، اور وہاں پاکستان سے زیادہ مضبوط اسٹیبلشمنٹ ہے۔
واضح رہے کہ ری پبلکنز امیدوار ڈونلڈ ٹرمپ ڈیموکریٹک امیدوار کملا ہیرس کو شکست دے کر امریکا کے دوسری بار صدر منتخب ہوگئے ہیں۔
نومنتخب امریکی صدر کو جہاں دنیا بھر سے مبارکباد کے پیغامات دیے جارہے ہیں، وہیں وزیراعظم پاکستان شہباز شریف نے بھی انہیں مبارکباد دی ہے، جبکہ چیئرمین پیپلزپارٹی بلاول بھٹو نے بھی ڈونلڈ ٹرمپ کو امریکا کا صدر منتخب ہونے پر مبارکباد دی ہے۔
دوسری جانب پاکستان تحریک انصاف کے سینیئر رہنما ذلفی بخاری نے عمران خان کی طرف سے ڈونلڈ ٹرمپ کو مبارکباد دی ہے۔
سماجی رابطے کی سائٹ ’ایکس‘ پر اپنے ایک بیان میں ذلفی بخاری نے لکھا کہ عمران خان اور تحریک انصاف کی طرف سے ڈونلڈ ٹرمپ اور جے ڈی وانس کو جیت کی مبارکباد پیش کرتے ہیں۔
اس کے برعکس صدر مسلم لیگ ن نواز شریف نے ڈونلڈ ٹرمپ کی جیت پر تبصرے سے گریز کیا ہے۔
یہ بھی پڑھیں عمران خان اور پاکستان تحریک انصاف کی ڈونلڈ ٹرمپ کو جیت کی مبارکباد
لندن میں صحافی نے جب ان سے سوال کیاکہ ڈونلڈ ٹرمپ امریکا کا انتخاب جیت گئے ہیں اس پر کیا کہیں گے، جس پر انہوں نے جواب دیا کہ ابھی میں جنیوا جارہا ہوں، پھر بات کریں گے۔
