معروف اداکارہ و ٹی وی میزبان جگن کاظم نے اے ایس پی شہربانو کے ہاتھ پر بوسہ لینے کی وجہ بتا دی۔
حال ہی میں جگن کاظم نے احمد علی بٹ کے پوڈکاسٹ میں شرکت کی جہاں میزبان نے جگن کاظم سے سوال کیا کہ انہوں نے اے ایس پی شہربانو کے ہاتھ کا بوسہ کیوں لیا تھا؟ جس پر اداکارہ نے انکشاف کیا کہ وہ اپنی پہلی شادی میں بہت مار کھاچکی ہیں اور چونکہ اے ایس پی نے ایسے لوگوں کے خلاف ایکشن لیا لہٰذا وہ شہربانو نقوی کی شکر گزار ہیں اور اسی لیے انہوں نے اے ایس پی شہر بانو کے ہاتھ کا بوسہ لیا۔
پوڈ کاسٹ میں بات کرتے ہوئے ان کا مزید کہنا تھا کہ ان کا شہربانو نقوی سے کوئی رشتہ نہیں ہے اور نہ ہی ان کے شوہر فیصل نقوی کا ان سے کوئی تعلق ہے۔ انہوں نے مزید کہا کہ میرا شو میں کوئی ایجنڈا نہیں تھا اور اگر محسن نقوی میرے شوہر کے بھائی ہیں تو میرا کیریئرسوالیہ نشان کیوں بن گیا ہے؟ ان کا کہنا تھا کہ انہوں نے 24 نیوز میں 6 ماہ نوکری کی تو لوگ کہنے لگ گئے کہ رابطوں کی وجہ سے کام ملا ہے۔ یہاں تک کہ انہیں استعفیٰ دینا پڑا کیونکہ ہر کوئی یہی بات کرنے لگا تھا۔
واضح رہے کہ جگن کاظم ماضی میں اعتراف کرچکی ہیں کہ پہلی شادی کرتے وقت ان سے ہی غلطی ہوئی کیونکہ ان کے شوہر دیکھنے میں بہت اچھے تھے اس لیے انہوں نے ان سے شادی میں جلدی کی اور تشدد برداشت کرنے میں بھی ان کی ہی غلطی تھی۔
یہ بھی پڑھیں: اے ایس پی شہربانو نقوی کے ویڈیو بیان پر پی ٹی آئی برہم کیوں؟
اداکارہ نے اعتراف کیا کہ جب انہیں پہلی بار شوہر کی مار پڑی تب وہ حمل سے نہیں تھیں اور انہیں اس رشتے سے نکل جانا چاہیے تھا لیکن وہ بیوقوف تھیں جو ایسا نہ کرسکیں۔ انہوں نے مزید بتایا کہ انہوں نے ڈیڑھ سال تک پہلے شوہر کا جسمانی تشدد برداشت کیا اور ان کے شوہر نے انہیں مار مار کر ان کا بُرا حال کردیا تھا۔ یہاں تک کہ شوہر نے انہیں حمل کی حالت میں برہنہ کرکے باہر پھینک دیا تھا۔
خیال رہے کہ جگن کاظم کی دوسری شادی سال 2013 میں فیصل ایچ نقوی کے ساتھ ہوئی، جن سے ان کا ایک بیٹا اور بیٹی ہیں، اداکارہ کے مجموعی طور پر 2 شادیوں سے 3 بچے ہیں۔
