پاکستان اور آسٹریلیا کے درمیان 3 میچوں کی ٹی20 سیریز کے دوسرے میچ میں کینگروز نے گرین شرٹس کو 13 رنز سے شکست دے کر سیریز اپنے نام کر لی، آسٹریلیا کے 147 رنز کے تعاقب میں پاکستان کی پوری ٹیم 19.4 اوورز میں 134 رنز پر پویلین لوٹ گئی۔
آسٹریلیا کے 148 رنز کے ہدف کا تعاقب کرتے ہوئے پاکستان کی پہلی وکٹ 12 رنز پر گری جب بابراعظم 3 رنز بنا کر کیچ آؤٹ ہوئے، دوسری وکٹ صاحبزادہ فرحان کی تھی جو 17 کے مجموعی اسکور پر 5 رنز کا حصہ ڈال کر چلتے بنے۔
پاکستان کی تیسری وکٹ 44 رنز پر گری جب کپتان محمد رضوان 16 رنز پر کیچ آؤٹ ہوئے، چوتھی وکٹ بھی 44 رنز پر ہی گری جب آغا سلمان بنا کھاتا کھولے بغیر جانسن کی گیند پر کیچ آؤٹ ہو گئے۔
پاکستان کی پانچویں وکٹ 102 کے مجموعی اسکور پر گری جب عثمان خان 1 چھکے اور 4 چوکوں کی مدد سے 52 رنز کی شاندار اننگز کھیلنے کے بعد اسپینسر جانسن کی گیند پر زیویر بارٹلیٹکے ہاتھوں کیچ آؤٹ ہو گئے۔
پاکستان کی چھٹی وکٹ 106 کے مجموعی اسکور پر گری جب عباس آفریدی 4 رنز بنا کر اسپینسر جانسن کی گیند پر میتھیو شارٹ کے ہاتھوں کیچ آؤٹ ہو گئے، ساتویں وکٹ بھی 107 کے مجموعی اسکور پر گر گئی جب شاہین شاہ آفریدی کو زمپا نے صفر پر بولڈ کر دیا۔
پاکستان کی آٹھویں وکٹ بھی 107 کے ہی مجموعی اسکور پر گر گئی جب نسیم شاہ کو بھی آسٹریلین اسپنر زمپا نے صفر پر بولڈ کر دیا، پاکستان کی نویں وکٹ 127 کے مجموعی اسکور پر گری جب سفیان مقیم صفر پر رن آؤٹ ہو گئے، پاکستان کی دسویں وکٹ اور آخری آؤٹ ہونے والے کھلاڑی حارث راؤف تھے جو 2 رنز بنا کر رن آؤٹ ہو گئے۔
پاکستان کی طرف سے چھٹے نمبر پر کھیلنے والے عرفان خان نے عثمان خان کے بعد شاندار کھیل کا مظاہرہ کیا انہوں نے 28 گیندوں پر 1 چھکے اور 4 چوکوں کی مدد سے 37 رنز اسکور کیے اور آؤٹ نہیں ہوئے۔
آسٹریلیا کی طرف سے اسپینسر جانسن نے شاندار بولنگ کا مظاہرہ کرتے ہوئے پاکستان کے 5 کھلاڑیوں کا شکار کیا، ایڈم زمپا نے 2 جب کہ زیویر بارٹلیٹ نے ایک کھلاڑی کو آؤٹ کیا۔
اس سے قبل آسٹریلیا کی ٹیم نے مقررہ 20 اووز میں 9 وکٹوں کے نقصان پر 147 رنز بنائے ۔ پاکستان کی جانب سے حارث رؤف نے 4، عباس آفریدی نے 3 اور سفیان مقیم نے 2 کھلاڑیوں کو آؤٹ کیا۔
سڈنی میں کھیلے جا رہے دوسرے ٹی20 میچ میں میزبان آسٹریلیا نے پاکستان کیخلاف ٹاس جیت کر پہلے بیٹنگ کرنے کا فیصلہ کیا۔ میچ سڈنی کرکٹ گراؤنڈ (ایس سی جی) میں کھیلا گیا۔ قومی ٹیم کی قیادت محمد رضوان کر رہے تھے جبکہ کینگروز کی کمان جوش انگلس کے ہاتھوں میں ہے۔
آسٹریلیا نے دوسرے ٹی20 انٹرنیشنل میں پاکستان کے خلاف جارحانہ آغاز کیا اور ابتدائی 3 اوورز میں بغیر کسی نقصان کے 48 رنز بنالیے ۔ پہلی وکٹ 52 رنز پر گری جب جیک فریزر حارث رؤف کی گیند پر آغا سلمان کے ہاتھوں کیچ آؤٹ ہوئے۔
آسٹریلیا کی دوسری وکٹ بھی 52 رنز پر گری، یہ حارث رؤف کے اوور کی آخری گیند تھی۔ کینگرو کپتان جوش انگلس کھاتا کھولے بغیر سفیان مقیم کے ہاتھوں کیچ آؤٹ ہوئے۔ تیسری وکٹ 56 رنز پر گری جب اوپنر میتھیو شارٹ عباس آفریدی کی تیز گیند پر کلین بولڈ ہو گئے۔ میتھیو نے 32 رنز اسکور کیے۔
آسٹریلیا کی چوتھی وکٹ 86 پر گری جب مارکس اسٹوئنس 14 رنز بنا کر سفیان مقیم کی گیند پر عباس آفریدی کے ہاتھوں کیچ آؤٹ ہوئے۔ پانچویں وکٹ 95 رنز پر میکسویل کی صورت میں گری جب وہ 21 رنز بنا کر سفیان مقیم کی گیند پر صاحبزادہ فرحان کے ہاتھوں کیچ آؤٹ ہوئے۔
آسٹریلیا کی چھٹی وکٹ 115 رنز پر گری جب ٹم ڈیوڈ 18 رنز بنا کر حارث رؤف کی گیند پر عباس آفریدی کے ہاتھوں کیچ آؤٹ ہوئے۔ ساتویں وکٹ 139 رنز پر گری جب زیویئر بارٹلیٹ کو حارث نے بولڈ کردیا، وہ محض 5 رنز بنا سکے۔
آسٹریلیا کی 8ویں اور 9ویں وکٹ 146 پر گریں۔ جب ایرون ہارڈی (28رنز) اور سپینسر جانسن (صفر رنز) عباس آفریدی کی گیندوں پر محمد رضوان اور صاحبزادہ فرحان کے ہاتھوں کیچ آؤٹ ہوئے۔
مزید پڑھیں:آئی سی سی چیمپیئنز ٹرافی میزبان ملک پاکستان پہنچ گئی
آسٹریلیا نے پچھلے میچ کی فاتح سائیڈ کو برقرار رکھا ہے جب کہ پاکستان نے ٹیم میں ایک تبدیلی کی ہے، حسیب اللہ کی جگہ صفیان مقیم کو پلینگ الیون میں شامل کیا گیا ۔ 3 ٹی20 میچز کی سیریز کے پہلے میچ میں میزبان آسٹریلیا نے پاکستان کو 29 رنز سے شکست دی تھی، بارش کی وجہ سے دونوں ٹیموں کے درمیان میچ 7، 7 اوورز تک کے لیے محدود کردیا گیا تھا۔
پاکستان اسکواڈ
قومی ٹیم میں کپتان محمد رضوان، بابر اعظم، صاحبزادہ فرحان، عثمان خان، سلمان علی آغا، عرفان خان نیازی، سفیان مقیم، شاہین شاہ آفریدی، نسیم شاہ، حارث رؤف اور عباس آفریدی شامل ہیں۔
آسٹریلیا اسکواڈ
آسٹریلیا کا سکواڈ جیک فریزر، میتھیو شارٹ، جوش انگلس (کپتان)، گلین میکسویل، ٹم ڈیوڈ، مارکس سٹوئنس، ایرون ہارڈی، زیویئر بارٹلیٹ، ناتھن ایلس، ایڈم زمپا اور سپینسر جانسن پر مشتمل ہے۔
