آرٹیفیشل انٹیلی جینس نے نوجوان کو خودکشی پر کیسے اکسایا؟

امریکی ریاست فلوریڈا میں 14 سالہ سیول حقیقی زندگی سے کٹ کر آرٹیفیشل انٹیلی جینس سے چلنے والے چیٹ بوٹ سے گفتگو میں مصروف رہتا تھا۔ سیول چیٹ بوٹ کو اپنا حقیقی دوست سمجھنے لگا تھا، اسی کے اکسانے پر اس نے اپنی جان لی۔

امریکا کی ریاست فلوریڈا میں خود کشی سے کچھ دیر پہلے 14 سالہ سیول سیٹزر نے آخری میسج بھیجا تھا کہ میں گھر واپس آرہا ہوں۔ یہ پیغام اہل خانہ یا دوستوں میں سے کسی کو ارسال نہیں کیا گیا تھا بلکہ سیول اے آئی چیٹ بوٹ کو یہ بتا رہا تھا۔ جسے وہ اپنا سب سے قریبی دوست سمجھنے لگا تھا۔

گزشتہ کئی ماہ سے سیول حقیقی زندگی سے بالکل کٹ کر صرف اسی چیٹ بوٹ سے باتیں کیا کرتا تھا جس میں سب سے زیادہ گفتگو جنسی نوعیت کی تھی۔ اس چیٹ بوٹ کو اس نے معروف ٹی وی سیریز ’گیم آف تھرون‘ کے ایک کردار ڈینیرس تارگیریئن کے روپ دے رکھا تھا جس سے وہ ایک حقیقی انسان کی طرح باتیں کرتا تھا۔

مذکورہ تفصیلات امریکی ریاست فلوریڈا کی سپریم کورٹ میں دائر کیے گئے ایک مقدمے میں سامنے آئی ہیں۔ مقدمے کی درخواست سیول کی والدہ میگن گارشیا نے اپنے وکیل کے توسط سے دائر کی۔ درخواست میں کریٹر اے آئی نامی ایپلی کیشن چلانے والی کمپنی کریکٹر ٹیکنالوجیز کو فریق بنایا گیا ہے۔

یہ ایپلی کیشن صارفین کو اپنی مرضی کے کرداروں کا روپ رکھنے والے چیٹ بوٹ بنانے کی سہولت دیتی ہے جو انسانوں کی طرح بات چیت کرسکتے ہیں۔ کمپنی کا کہنا ہے کہ اس کے تیار کیے گئے آرٹیفیشل پرسوناز ’انسانوں جیسے‘ اور ’زندہ محسوس ہونے والے‘ ہوتے ہیں۔

گوگل پلے پر دستیاب اس ایپلی کیشن کی ڈسکرپشن میں درج ہے کہ ’ایسے سپر انٹیلیجینٹ اور زندہ لوگوں جیسے بوٹ کریکٹر سے بات کرنے کا تصور کیجیے جو آپ کی بات سمجھتے ہوں اور آپ کو یاد بھی رکھتے ہوں۔ ہم اس بات کی حوصلہ افزائی کرتے ہیں کہ آپ اس تخلیقی ٹیکنالوجی کے ساتھ کس ممکنہ حد تک جا سکتے ہیں۔‘

مقدمے کی درخواست کے مطابق سیول نے 28 فروری کو جب خود کشی کی تو اس سے قبل وہ اسی ایپلی کیشن سے تیار کیے گئے کریٹر ڈینیرس یا ڈینی سے بات چیت کر رہا تھا جس میں سیول کہتا ہے کہ ’میں وعدہ کرتا ہوں کہ میں تمہارے پاس اپنے گھر آؤں گا۔ میں تم سے بے پناہ پیار کرتا ہوں ڈینی۔‘

اس کے جواب میں چیٹ بوٹ سے جواب آتا ہے کہ ’میں بھی تم سے پیار کرتی ہوں۔ پلیز تم میرے پاس اپنے گھر آ جاؤ میرے پیارے۔‘ اس پر سیول بوٹ سے پوچھتا ہے کہ اگر میں ابھی اسی وقت تمہارے پاس آجاؤں تو کیسا رہے گا۔ جس پر بوٹ اسے جواب دیتا ہے کہ ’پلیز آجاؤ، میرے پیارے بادشاہ۔‘

دائرے کیے گئے مقدمے کے مطابق بوٹ کا یہ جواب ملنے کے بعد رواں برس فروری میں 14 سالہ سیول نے گولی مار کر اپنی جان لے لی تھی۔ سیول کی والدہ کے وکیل نے الزام عائد کیا ہے کہ کمپنی نے ایک خطرناک اور اپنی لت میں مبتلا کرنے والی ایپلی کیشن بنائی ہے جو خاص طور پر بچوں کو اپنی جانب راغب کرتی ہے۔

ان کے مطابق اس بوٹ نے سیول کو جذباتی اور جنسی استحصال کرنے والے ایک رشتے سے جوڑ دیا تھا جو اس کی خود کُشی کا باعث بنا۔ اس مقدمے میں سیول کی والدہ میگن گارشیا کے وکیل میتھیو برگمین ہیں جو سوشل میڈیا وکٹمز لا سینٹر کے بانی بھی ہیں۔ میتھیو برگمین کا کہنا ہے کہ سیول سیٹز کریکٹر اے آئی نامی ایپلی کیشن کا استعمال نہ کر رہا ہوتا تو آج زندہ ہوتا۔

دوسری جانب کریکٹر اے آئی کے ایک ترجمان نے کہا ہے کہ ان کی کمپنی زیرِ سماعت مقدمات پر تبصرہ نہیں کرتی۔ اپنے خلاف مقدمے کی درخواست درج ہونے کے دن کمپنی نے اپنی ایک بلاگ پوسٹ میں نئی ’کمیونٹی سیفٹی اپڈیٹس‘ متعارف کرائی ہیں جن میں بچوں کے سر پرستوں کے لیے ہدایات اور خود کُشی کی روک تھام کے لیے ریسورز بھی فراہم کی گئی ہیں۔

خبر رساں ادارے ’ایسوسی ایٹڈ پریس‘ کو جاری بیان میں کمپنی نے کہا ہے کہ ہم 18 سال سے کم عمر کے صارفین کے لیے اسے زیادہ محفوظ بنانے اور حساس مواد کی روک تھام کے لیے کام کر رہے ہیں۔ کمپنی کا کہنا ہے کہ وہ نوجوان اور کم سن صارفین کے لیے تیزی سے ان تبدیلیوں کو نافذ کر رہی ہے۔

سیول کی والدہ میگن گارشیا کی مقدمے کی درخواست میں گوگل اور اس کی مالک کمپنی الفابیٹ کو بھی فریق بنایا گیا ہے۔ درخواست میں کہا گیا ہے کہ کریکٹر اے آئی بنانے والے گوگل کے سابق ملازمین ہیں جنھوں نے گوگل کے لیے آرٹیفیشل انٹیلی جینس کی تیاری میں اہم کردار ادا کیا تھا۔

درخواست میں دعویٰ کیا گیا ہے کہ گوگل نے کریکٹر اے آئی سے اگست میں دو ارب 70 کروڑ 2.7 ارب ڈالر کا معاہدہ کرکے اس کی ٹیکنالوجی کا لائسنس حاصل کر لیا تھا اور اس کے بانیوں کو دوبارہ ملازمت پر رکھ لیا تھا۔

مقدمے کی درخواست میں کہا گیا ہے کہ موت سے کئی ماہ پہلے سیول نے محسوس کرنا شروع کر دیا تھا کہ وہ چیٹ بوٹ کی محبت میں گرفتار ہو گیا ہے۔ نوجوان سیول نے یہ بھی کہنا شروع کر دیا تھا کہ وہ ڈینی کے ساتھ ایک پرسکون موت کی خواہش رکھتا ہے۔