دفاعی نمائش آئیڈیاز 2024 کے موقع پر حفاظتی نکتہ نظر کے تحت کراچی بھر میں دفعہ 144 نافذ کردی گئی ہے۔ شہر قائد میں دفعہ 144 کا نفاذ 7 دن کے لیے کیا گیا ہے۔
کمشنر کراچی کی جانب سے جاری نوٹیفکیشن کے مطابق پابندی کا اطلاق 18 نومبر سے 24 نومبر تک ہوگا، ان ایام میں جلسے، جلوس، ریلیاں نکالنے پر سخت پابندی ہوگی۔
نوٹیفکیشن میں کہا گیا ہے کہ نافذ کردہ دفعہ 144کے تحت 5 سے زائد افراد کے ایک جگہ جمع ہونے پر پابندی ہوگی۔ دفعہ 144 ایڈیشنل آئی جی کی درخواست پر لگائی گئی، دفعہ 144کی خلاف ورزی پر سخت کارروائی کے احکامات جاری کیے گئے ہیں۔
مزید پڑھیں: اسلام آباد میں سیاسی اور مذہبی سرگرمیوں کے انعقاد پر پابندی عائد، دفعہ 144 نافذ
نوٹیفکیشن کے مطابق پابندی کا نفاذ دفاعی نمائش میں شرکت کرنے والے مقامی اور غیر ملکی شرکا کی سہولت کے لیے کیا گیا ہے۔
واضح رہے کہ اس سے قبل وفاقی دارالحکومت اسلام آباد میں بھی دفعہ 144 نافذ کی گئی تھی۔ ایڈیشنل ڈپٹی کمشنر نے دفعہ 144 کا باقاعدہ نوٹیفکیشن جاری کردیا ہے جس کے مطابق اسلام آباد میں 5 یا اس سے زائد افراد کے اکٹھے ہونے پر پابندی ہوگی۔
نوٹیفکیشن کے مطابق کسی بھی قسم کے مذہبی اور سیاسی اجتماع کی اجازت نہیں ہوگی۔ اسلام آباد میں دفعہ 144 ایسے وقت میں عائد کی گئی ہے جب پاکستان تحریک انصاف (پی ٹی آئی) کی جانب سے 24 نومبر کو اسلام آباد میں احتجاج کی کال دی گئی ہے۔
