وزیراعلیٰ پنجاب مریم نواز شریف نے ملکی تاریخ کے پہلے ’چیف منسٹر ڈائیلسز پروگرام کارڈ‘ کی منظوری دے دی ہے۔
وزیراعلیٰ پنجاب مریم نواز کے زیرصدارت شعبہ صحت سے متعلق اہم اجلاس ہوا۔ وزیراعلیٰ پنجاب نے ملتان میں ڈائیلسز مریضوں میں ایڈز پھیلنے کے واقعہ پر افسوس کا ظہار کرتے ہوئے کہا کہ فنڈز نہ ہونے کے عذر پر ڈائیلسز رکنا افسوسناک ہے، یہ جاری رہنا چاہیے۔ وزیراعلیٰ نے ملتان میں ڈائیلسز مریضوں میں ایڈز پھیلنے کے واقعہ پر 24 گھنٹے میں رپورٹ طلب کرلی۔
یہ بھی پڑھیں: ایئر پنجاب، مریم نواز کی تجویز پر نواز شریف کی بھی حمایت
وزیراعلیٰ مریم نواز نے ڈائیلسز کے مریض کےعلاج کے لیے فنڈز 10 لاکھ روپے تک بڑھا دیے ہیں۔ پروگرام کے تحت پنجاب میں گردوں کی بیماری میں مبتلا ہر مریض کے لیے ساڑھے 8 لاکھ روپے ڈائیلسز جبکہ ڈیڑھ لاکھ روپے ٹیسٹ وغیرہ کے لیے مختص کیے جائیں گے۔ وزیراعلیٰ نے ڈائیلسز مریضوں کے لیے مفت ادویات اور ٹیسٹ یقینی بنانے کی ہدایت کی ہے۔
دوران اجلاس پنجاب میں مزید ڈائیلسز یونٹ قائم کرنے پراصولی اتفاق کیا گیا، وزیراعلیٰ پنجاب مریم نواز نے پنجاب ہیلتھ کیئر کمیشن کو ڈائیلسز سینٹر میں ایس اوپیز پر عمل درآمد اور ڈائلسز سینٹرز کی کڑی مانیٹرنگ یقینی بنانے کی ہدایت کی۔
یہ بھی پڑھیں: کسان کارڈ کا اجرا، وزیر اعلیٰ پنجاب کا ایک ہزار ٹریکٹر دینے کا بھی اعلان
اجلاس کو بریفنگ دی گئی کہ پنجاب میں دیگر صوبوں کے مریض بھی مفت ڈائیلسز کی سہولت سے فیض یاب ہو رہے ہیں، پنجاب سے مفت ادویات سندھ، بلوچستان اوردیگرصوبوں میں جارہی ہیں۔ وزیر اعلی پنجاب نے پی آئی سی ٹو کو سٹیٹ آف دی آرٹ اسپتال بنا نے کی ہدایت کی۔
ان کا کہنا تھا کہ امراض قلب کے لیے جدید ترین ٹیکنالوجی، آلات اور ادویات لائی جائیں، اسپشلسٹ ڈاکٹرز کی جدید ترین ٹریننگ کرائی جائے، اس کے علاوہ ماسٹر ٹرینرز بھی تعینات کیے جائیں۔
