عمران خان اور بشرٰی بی بی کے خلاف دوران عدت نکاح کیس میں نکاح خواں مفتی محمد سعید اپنے وکیل راجہ رضوان عباسی کے ہمراہ ڈسٹرکٹ اینڈ سیشن کورٹ پہنچے جہاں سینیئر سول جج نصر مِن اللّٰہ بلوچ نے ان کا بیان قلمبند کرایا۔
اپنا بیان قلمبند کراتے ہوئے مفتی سعید نے بتایا کہ عمران خان نے انہیں اپنے پہلے نکاح کے غیر شرعی ہونے کے بارے میں آگاہ کیا تھا۔ ’عمران خان نے پہلا نکاح بشرٰی بی بی کی عدت کے دوران کیا تھا۔ دونوں نے سب جانتے ہوئے دورانِ عدت نکاح کیا۔‘
مفتی سعید کے مطابق عمران خان نے ان سے یکم جنوری 2018ء کو رابطہ کرکے لاہور میں اپنا نکاح پڑھانے کا کہا۔ بشرٰی بی بی کے ساتھ ایک خاتون نے خود کو بشرٰی بی بی کی بہن ظاہر کرتے ہوئے بتایا کہ بشرٰی بی بی کے نکاح کی تمام شرعی شرائط مکمل ہیں۔ عمران خان اور بشرٰی بی بی کا نکاح پڑھایا جا سکتا ہے۔
بیان میں مفتی سعید نے کہا ہے کہ یکم جنوری 2018ء کو ان خاتون کی یقین دہانی پر عمران خان اور بشرٰی بی بی کا نکاح پڑھا دیا جس کے بعد فروری میں ان سے رابطہ کرکے بشرٰی بی بی سے دوبارہ نکاح پڑھانے کی درخواست کی گئی۔
مفتی محمد سعید خان نے بیان دیتے ہوئے کہا کہ عمران خان نے بتایا کہ نومبر 2017ء میں طلاق کے بعد پہلے نکاح کے وقت بشرٰی بی بی کی عدت مکمل نہیں ہوئی تھی۔
’عمران خان نے مجھے بتایا کہ بشرٰی بی بی نے ان سے نکاح کرنے پر پیش گوئی کی تھی کہ وہ وزیرِ اعظم بن جائیں گے، عمران خان نے بتایا کہ پہلا نکاح غیر شرعی تھا۔‘
مفتی محمد سعید خان نے عدالت کو دیے گئے بیان میں یہ بھی کہا ہے کہ عمران خان اور بشرٰی بی بی نے سب جانتے ہوئے بھی نکاح اور شادی کی تقریب منعقد کی۔ عمران خان اور بشرٰی بی بی کا نکاح غیر قانونی ہے جو پیش گوئی کی وجہ سے ہوا۔
عمران خان اور بشرٰی بی بی کے نکاح خواں کا بیان قلم بند ہونے کے بعد عدالت نے 28 اپریل کو درخواست گزار محمد حنیف کے وکیل سے درخواست کے قابلِ سماعت ہونے پر دلائل طلب کیے ہیں۔
اس سے قبل آج عدالت نے چیئرمین پی ٹی آئی عمران خان اور ان کی اہلیہ بشرٰی بی بی کے خلاف غیر شرعی نکاح کے کیس کی جلد سماعت کرنے کی درخواست منظور کرتے ہوئے مفتی سعید کا آج ہی بیان قلمبند ہونے کے لیے مقرر کیا تھا۔
درخواست گزار محمد حنیف نے مؤقف اپنایا کہ کیس کے مرکزی گواہ مفتی محمد سعید عدالت میں اپنا بیان قلم بند کرانے کے لیے دستیاب ہیں۔ 8 اپریل کی گزشتہ سماعت کے موقع پر مفتی سعید عمرے پر روانگی کے باعث بیان ریکارڈ نہیں کراسکے تھے۔
درخواست گزار نے عدالت سے استدعا کی کہ عمران خان اور بشرٰی بی بی کے خلاف غیر شرعی نکاح کا کیس جلد سماعت کے لیے مقرر کیا جائے۔
