سپریم کورٹ بار ایسوسی ایشن نے خیبرپختونخوا کے ضلع کرم میں گزشتہ روز دہشت گردانہ کارروائی کی شدید مذمت کی ہے، جس میں 42 سے زائد معصوم مسافروں کو فائرنگ کرکے قتل کردیا گیا تھا۔
سپریم کورٹ بار ایسوسی ایشن کے سیکریٹری سلمان منصور کی جانب سے جاری کردہ اعلامیہ کے مطابق صدر میاں رؤف عطا اور 27ویں ایگزیکٹو کمیٹی نے گزشتہ روز ہونے والے واقعہ کی شدید الفاظ میں مذمت کرتے ہوئے دہشتگردانہ کارروائی میں جان بحق شہریوں کے لواحقین سے اظہار ہمدردی کیا ہے۔
یہ بھی پڑھیں:26ویں آئینی ترمیم پر سپریم کورٹ بار ایسوسی ایشن اختلافات کا شکار
اعلامیہ کے مطابق دہشتگردوں نے ایک اور سفاکانہ کارروائی میں کرم کے قریب 42 سے زائد معصوم مسافروں کو قتل کیا، اس کارروائی میں درجنوں خواتین، بچے زخمی ہوئے، صوبائی حکومت اور قانون نافذ کرنے والے ادارے دہشت گردی کی کارروائی کے خطرات کا اندازہ لگانے میں ناکام رہے۔
’مہذب معاشروں میں دہشت گردی کی کوئی جگہ نہیں، ہماری قوم نے دہشت گردی کی لعنت کا بہادری سے مقابلہ کیا ہے اور ماضی میں اسے شکست دی ہے، موجودہ وقت ایک بار پھر اسی عزم کا تقاضا کرتا ہے۔‘
مزید پڑھیں:سپریم کورٹ بار ایسوسی ایشن کا بلوچستان میں فوجی آپریشن کے فیصلے پر ردعمل
سپریم کورٹ بار ایسوسی ایشن نے مطالبہ کیا ہے کہ سیاسی معاملات پر بیشتر وسائل ضائع کرنے کی بجائے امن و امان کی صورتحال بہتر بنائی جائے، وفاقی اور صوبائی حکومتیں اور قانون نافذ کرنے والے عام شہریوں کی سلامتی، امن اور تحفظ کو یقینی بنانے کے لیے فوری اقدامات کریں۔
