پاکستانی نژاد ملائیشین رائل ایئر فورس کے سربراہ جنرل محمد اصغر خان نے گزشتہ جمعہ کے روز اپنے آبائی علاقے بیڑ، ہری پور کا مختصر دورہ کیا جس کے دوران اُنہوں نے اپنے دادا مرحوم ملک قلندر خان، چچا ملک یعقوب، کزن حافظ رمیز اور دادی کی قبروں پر حاضری دی اور مرحومین کے لیے فاتحہ خوانی کی۔
اے پی پی سے گفتگو کے دوران ڈسٹرکٹ پولیس آفیسر ہری پور فرحان خان نے بتایا کہ اُن کا دورہ 2 گھنٹے پر محیط تھا جس دوران اُنہوں نے اپنے رشتہ داروں سے ملاقات بھی کی۔
ملائیشیا کی رائل ایئر فورس کے چیف محمد اصغر خان کے چچا زاد بھائی اور لوکل گورنمنٹ خیبر پختونخوا کے اسسٹنٹ ڈائریکٹر مختار احمد نے بتایا کہ محمد اصغر خان کے دادا ملک قلندر خان قیام پاکستان سے قبل ملائیشیا گئے تھے جہاں محمد اصغر خان کے والد گوہر امان اور چچا ملک محمد یعقوب کی پیدائش ہوئی، محمد اصغر خان کے والد گوہر امان ملائیشیا پولیس میں آفیسر رینک سے ریٹائر ہوئے۔
مزید پڑھیں: شیر افضل مروت کے آبائی گاؤں میں ان کے حجرے کو کس نے آگ لگائی؟
مختصر دورے کے دوران ملائیشین رائل ایئر فورس کے سربراہ جنرل محمد اصغر خان کی اہلیہ بھی ہمراہ تھیں جن کی والدہ کا آبائی علاقہ بھی ہری پور کی وی سی گندف اور گاؤں گھیری ہے۔
مختار احمد نے مزید بتایا کہ دورے کے دوران محمد اصغر خان نے اپنے دادا، دادی، چچا اور کزن کی قبروں پر حاضری دی اور اپنے آبائی گھر کا مختصر دورہ کیا، بعد ازاں اُنہوں نے گرلز ہائیر سیکنڈری اسکول بیڑ میں اپنے رشتہ داروں اور عزیز و اقارب سے ملاقات کی۔
انہوں نے بتایا کہ محمد اصغر خان کا تعلق اعوان قبیلے سے ہے اور اس سے قبل وہ 2008 میں ایک ٹریننگ کے لیے کراچی آئے تھے۔ علاقے کے لوگ محمد اصغر خان کی آمد پر انتہائی پرجوش دکھائی دیے اور وہ اسے ہری پور کے لیے ایک اعزاز تصور کرتے ہیں کہ کسی دوسرے ملک کی رائل ایئرفورس کا سربراہ ہری پور اور علاقہ تناول کا سپوت ہے۔
