ڈپٹی وزیراعظم و وزیر خارجہ اسحاق ڈار نےدفتر خارجہ میں پاکستان فارن آفس ویمن ایسوسی ایشن کے زیراہتمام چیئرٹی بازار کا افتتاح کردیا۔
اتوار کو دفتر خارجہ میں چیئرٹی بازار کی افتتاحی تقریب ہوئی، جس میں ڈپٹی وزیراعظم اسحاق ڈار نے پاکستان فارن آفس ویمن ایسوسی ایشن سالانہ چیئرٹی بازار 2024 کا افتتاح کیا۔
چیئرٹی بازار میں مختلف سفارتخانوں کی جانب سے اسٹال اور اپنے اپنے ملکوں کی ثقافتی نمائش کا اہتمام کیا گیا ہے۔ اس موقع پر غیر ملکی سفارتکار اور ان کے اہل خانہ بھی بڑی تعداد بھی چیئرٹی بازار میں موجود تھے۔
وزارت خارجہ کے آفیسران کی بڑی تعداد بھی اس موقع پر موجود تھی، اس بازار کا مقصد معاشرے میں مستحق اور کمزور طبقات کی معاونت اور فلاح کرنا ہے۔
اس موقع پر اظہار خیال کرتے ہوئے ڈپٹی وزیراعظم اسحاق ڈار نے کہاکہ یہ چیئرٹی بازار راولپنڈی اسلام آباد کے شہریوں کے لیے ایک موقع ہے کہ وہ فارن آفس کا دورہ کرسکیں اور دوسرے ممالک کی ثقافت دیکھ سکیں۔ اس کے علاوہ ان کے ہینڈی کرافٹس، خوراک سے مستفید ہونے کے علاوہ ’پفوا‘ کے کاز میں شریک ہوسکیں گے۔
انہوں نے کہاکہ یہ بازار متنوع ثقافتوں اور تجربات کا حسین امتزاج ہے جو مختلف اقوام کے درمیان ہم آہنگی کا ذریعہ ہے۔ بازار میں لگے مختلف ممالک کے اسٹالز اور ثقافتی نمائش میں ان ممالک کی ثقافت کو بھرپور انداز میں اجاگر کیا گیا ہے۔
اسحاق ڈار نے کہاکہ وزیٹرز کے لیے یہ بازار ان ممالک کے فوڈ اور مختلف اشیا کا منفرد شاہکار ہے۔ اس بازار کا ایک مقصد پاکستان کی سماجی، ثقافتی اور اقتصادی زندگی کو اجاگر کرنا ہے۔
ڈپٹی وزیراعظم نے کہاکہ دفتر خارجہ ویمن ایسوسی ایشن اس قسم کی نمائشیں، کلچرل شو اور سماجی سرگرمیوں کا انعقاد کرتا ہے۔
اسحاق ڈار نے کہاکہ اس بازار کا موضوع ’جوائنٹ ہینڈز، جوائننگ ہارٹس‘ جو ایک دلچسپ موضوع ہے اور دنیا کو درپیش موجودہ چیلنجوں سے ہم آہنگ ہے۔ ہم نے دیکھا کہ ملائشیا میں سیلاب سے 1 لاکھ 40 ہزار افراد متاثر ہوئے ہیں۔
انہوں نے کہاکہ وزیراعظم شہباز شریف نے ملائیشین ہم منصب اور میں نے وزیر خارجہ سے بات کی ہے۔ ہمیں مل بیٹھ کر دوستی، بھائی چارے کو فروغ دینے کے لیے کاوشیں کرنا ہوں گی، یہ بازار اس جانب اہم سنگ میل ثابت ہوگا۔
