یوں تو مسجد نبوی میں دنیا بھر سے زائرین کی آمد کا سلسلہ برس کے 12مہینے جاری رہتا ہے لیکن رمضان المبارک میں یہ تعداد معمول سے کہیں زیادہ ہوتی ہے۔ اس سال زائرین اور نمازیوں کی اب تک کی تعداد تو پچھلے رمضان سے بھی 50 فیصد زائد ہے۔
العربیہ ڈاٹ نیٹ کی ایک رپورٹ کے مطابق امور حرمین شریفین کے سربراہ شیخ ڈاکٹر عبدالرحمن السدیس نے بتایا ہے کہ رمضان کریم کے پہلے دو عشروں کے دوران مسجد نبوی تشریف لانے والے مرد و خواتین نمازیوں اور زائرین کی تعداد 2 کروڑ 10 لاکھ تک پہنچ گئی ہے۔
شیخ ڈاکٹر عبدالرحمن السدیس نے بتایا کہ اس مرتبہ کی تعداد میں گزشتہ سال کے رمضان کے ابتدائی دو عشروں کے مقابلے میں 49 فیصد اضافہ ہوا ہے جبکہ محرم الحرام کے مہینے کے آغاز سے اب تک مسجد نبوی میں آنے والے نمازیوں کی کل تعداد 16 کروڑ 90 لاکھ سے زائد ہوچکی ہے۔
شیخ سدیس نے کہا کہ مسجد نبوی کے امور کا انتظام کرنے والی ایجنسی نے اپنے آپریشنل پلان کے ذریعے مسجد نبوی کو تیار کیا ہے اور ہر وہ چیز فراہم کی ہے جس سے نمازیوں اور زائرین کو سکون ملے اور عبادات کی ادائیگی میں آسانی ہو۔
انہوں نے اس حوالے سے خادم حرمین شریفین شاہ سلمان بن عبدالعزیز اور ولی عہد شہزادہ محمد بن سلمان کا خصوصی شکریہ ادا کیا جن کی توجہ کے باعث ضیوف الرحمن کے لیے بہترین حالات پیدا کرنے کے مواقع میسر آ رہے ہیں۔
مسجد نبوی میں 700 خواتین کے اعتکاف میں بیٹھنے کے انتظامات
مسجد نبوی میں اسٹریٹجک پلاننگ کی اسسٹنٹ انڈر سیکریٹری فایزہ المزینی نے بتایا ہے کہ 700 خواتین مسجد نبوی میں اعتکاف کر سکتی ہیں۔
ان کا کہنا تھا کہ موبائیل ایپ ’زائرون‘ کے ذریعے اعتکاف کے لیے درخواستوں کی وصولی اور اجازت نامے جاری کیے جاتے ہیں۔
المزینی نے کہا کہ رمضان المبارک کی آمد سے کئی ماہ قبل آپریشنل تیاری شروع کردی جاتی ہے۔ انہوں نے مزید کہا کہ آخری عشرہ کے دوران مسجد نبوی میں سال بھر سے زیادہ زائرین اور نمازی موجود ہوتے ہیں اور مسجد کا اندرونی حصہ، صحن ، چھت اور اس کی گزرگاہیں نماز کے دوران نمازیوں سے بھر جاتی ہیں۔
