بھارتی ٹینس اسٹار ثانیہ مرزا نے خواجہ افتخار میموریل نیشنل ٹینس چیمپیئن شپ کے انعقاد پر پاکستان ٹینس فیڈریشن کے صدر اعصام الحق قریشی اور چیمپیئن شپ میں شرکت کرنے والے کھلاڑیوں کے لیے نیک خواہشات اور مبارکباد دی ہے۔
اپنے ویڈیو پیغام میں بھارتی ٹینس اسٹار ثانیہ مرزا نے کہا کہ پاکستان میں ٹینس کے بڑے ایونٹ پر خاص طو پر پاکستان ٹینس فیڈریشن کے صدر اعصام الحق قریشی اور تمام کھلاڑیوں کو بہت بہت مبارک ہو، خطے میں ٹینس کے فروغ کے لیے ایسے ٹورنامنٹ ضروری ہیں۔
مزید پڑھیں: ’آپ میرے مسکرانے کی وجہ ہو‘، ثانیہ مرزا کا پیغام کس کے نام؟
واضح رہے کہ خواجہ افتخار میموریل نیشنل رینکنگ ٹینس چمپئن شپ 2024 کا آغاز آج سے اسپورٹس بورڈ پنجاب ٹینس اکیڈمی نشتر پارک لاہور میں ہوگا۔ چیمپیئن شپ میں پاکستان کے ٹینس آئیکون اور ستارہ امتیاز حاصل کرنے والے اعصام الحق قریشی کے علاوہ عقیل خان، اشنا سہیل اور ابھرتے ہوئے کھلاڑی مزمل مرتضیٰ، محمد شعیب، عابد مشتاق، مہک کھوکھر، شیزہ ساجد اور دیگر شامل ہیں۔
قابل ذکر انعامی رقم کے ساتھ یہ ٹورنامنٹ سنسنی خیز مقابلوں کے لیے ملک بھر میں ٹینس کے شوقین افراد کو اپنی طرف متوجہ کرے گا۔ پاکستان ٹینس فیڈریشن کے صدر اعصام الحق قریشی نے کہا کہ میرے پیارے دادا، خواجہ افتخار احمد کے نام پر ٹورنامنٹ میں شرکت کرنا اعزاز کی بات ہے، ان کی پاکستان میں ٹینس کے لیے بے مثال خدمات ہیں۔
مزید پڑھیں: ثانیہ مرزا کے شب و روز آج کل کیسے گزر رہے ہیں؟ نئی تصاویر جاری
ان کا کہنا تھا کہ یہ ٹورنامنٹ صرف خراج عقیدت نہیں بلکہ ان کی وراثت کا جشن ہے۔ میں اس ایونٹ کا حصہ بننے پر بہت خوش ہوں اور اسے زبردست کامیابی دلانے کے لیے اپنی پوری کوشش کروں گا۔ پی ٹی ایف کے صدر کی حیثیت سے میرا مقصد اسے سالانہ ایونٹ بنانا اور قومی کیلنڈر میں اس طرح کے مزید ٹورنامنٹس متعارف کرانا ہے تاکہ پاکستان میں ٹینس کی مسلسل سرگرمی اور ترقی کو یقینی بنایا جاسکے۔
India’s tennis star @MirzaSania wishes all the best to participating players and PTF president @aisamhqureshi ahead of Khawaja Iftekhar Memorial National Tennis Championship – this major tennis event of Pakistan’s tennis calendar starts tomorrow in Lahore. pic.twitter.com/Lvomk7z1gw
— Faizan Lakhani (@faizanlakhani) December 13, 2024
اعصام الحق کا کہنا تھا کہ مجھے امید ہے کہ یہ کوششیں ہمارے کھلاڑیوں کو زیادہ سے زیادہ بین الاقوامی شہرت حاصل کرنے اور پاکستان ٹینس کو نئی بلندیوں پر لے جانے کی ترغیب دیں گی۔
