دنیا بھر میں کہیں بھی فٹ بال کا نام آئے اور سیالکوٹ کا ذکر نہ ہو تو جملہ ادھورا لگتا ہے، کیونکہ کسی بھی ملک میں فٹ بال میچز ہوں تو سیالکوٹ کا بنا فٹ بال ہی استعمال کیا جاتا ہے۔ اسی طرح سعودی عرب میں کھیلی جانے والی لیگز اور فیفا ورلڈ کپ کے دوران بھی ہمیشہ سیالکوٹ کا بنا فٹ بال ہی استعمال کیا جاتا ہے۔
2023 کے ایکسپورٹ ڈیٹا کے مطابق دنیا بھر میں 236 ملین ڈالر مالیت کے فٹ بال برآمد کیے جاچکے ہیں جن کی تعداد 56 ملین ہے۔
نارتھ امریکا میں ہونے والے فٹ بال ورلڈ کپ 2026 میں بھی سیالکوٹ کے صنعت کاروں اور ہنرمندوں کے ہاتھوں سے تیار کردہ فٹ بال استعمال کیا جائے گا، اور امید کی جارہی ہے کہ 2034 میں سعودی عرب میں ہونے والے فٹ بال ورلڈ کپ میں بھی سیالکوٹ میں تیار ہونے والا فٹ بال ہی استعمال کیا جائےگا۔
جدید ٹیکنالوجی ’تھرموبونڈڈ‘ سے تیار فٹ بال جس میں دھاگے کا استعمال نہیں ہوتا کے استعمال کے بعد سیالکوٹ کی فٹ بال انڈسٹری ایک بار پھر سے ترقی کی طرف بڑھتی نظر آئے گی۔
صنعت کاروں کا کہنا ہے کہ پچھلے 72 سالوں سے سیالکوٹی صنعت کار اور ہنرمند عالمی معیار کے فٹ بال تیار کرکے اربوں روپے کا زرمبادلہ پاکستان لانے میں اہم کردار ادا کرتے آرہے ہیں جو قابلِ ستائش ہے۔
