رہنما مسلم لیگ ن جاوید لطیف کا کہنا ہے کہ باغیوں سے صرف نظر اور سائیکل چور کو لٹکانے سے ریاستیں نہیں چلتیں، کارکنوں کو سزا اور ماسٹر مائنڈ کا مقدمہ لٹکانے سے کچھ نہیں ہوگا۔
لاہور میں پریس کانفرنس کرتے ہوئے جاوید لطیف کا کہنا تھا کہ بانی پی ٹی آئی عمران خان کو چھڑوانے کے لیے دباؤ کااعتراف کیوں نہیں کیا جاتا، انہوں نے خبردار کیا کہ دباؤ میں آکر اٹھائے گئے قدم کیخلاف قوم کھڑی ہو کر دکھائے گی۔
یہ بھی پڑھیں: پارٹی پالیسی کے برخلاف بیان بازی پر میاں جاوید لطیف کی سرزنش؟
جاوید لطیف کا کہنا تھا کہ ڈالروں کے عوض ہمیں کوئی بے غیرتی نہیں سکھا سکتا، سول نافرمانی 9 مئی سے بڑا جرم ہے،انہوں نے عمران خان کا نام لیے بغیر کہا کہ آج وہ عالمی قوت کا منظور نظر کیوں ہے، عالمی قوتیں اس سے کیا کام لینا چاہتی ہیں۔
’بغاوت کرنے والے کو چھوڑنے اور سائیکل چور کو لٹکانے سے ریاستیں نہیں چلتیں، کارکنوں کو سزا اور ماسٹر مائنڈ کا کیس لٹکا دینے سے بات نہیں بنے گی، قوم کو جنرل فیض حمید کی گرفتاری کی وجہ بتانی چاہیے، انہیں ہاؤسنگ سوسائٹی کی وجہ سے گرفتار نہیں کیا گیا۔‘
مزید پڑھیں:چکوال والے شخص، بندیال اور ثاقب نثار کے فیصلوں سے ریاست کو نقصان پہنچا، جاوید لطیف
لیگی رہنما جاوید لطیف نے دعویٰ کیا کہ فیض حمید نے ادارے کے اندر بغاوت کی ناکام کوشش کی تھی، جو کسی اور ملک میں ہوتی تو اسے گولی سے اڑا دیا جاتا۔
جاوید لطیف کے مطابق لبنان، فلسطین، لیبیا اور شام کے بعد ایران پر نظریں لگی ہوئی ہیں، انہوں نے کہا کہ خیرات میں زندگی نہیں بلکہ غیرت کی موت عزیز ہے۔
مزید پڑھیں:عمران خان کی بیرون ملک سے سہولت کاری ہو رہی ہے، جاوید لطیف
مسلم لیگ ن کے رہنما نے یہ بھی کہا کہ آزادی اور غیرت سے بڑھ کر ہمیں کوئی چیز عزیز نہیں، ہم سیاسی محاذ پر تقسیم ہو جائیں گے، قومی غیرت پر تقسیم نہیں ہوں گے۔
’ہمیں کوئی ڈکٹیشن دے گا تو ہم سب ایک نظر آئیں گے، ہم ایٹمی طاقت ہیں، عالمی قوتوں کے دباؤ میں نہیں آئیں گے۔‘
