امتحان میں پاس ہونے کے لیے طلبا و طالبات جہاں نقل کا سہارا لیتے ہیں وہیں تعلیمی بورڈز میں جان پہچان کی بنیاد پر پاس ہونے کی کوشش بھی کی جاتی ہے، تاہم کراچی کے ایک طالبعلم نے اس حوالے سے ایک نئی مثال قائم کی ہے۔
کراچی کے ایک انٹرمیڈیٹ لیول کے طالبعلم نے امتحانی کاپی میں ایک ہزار روپے کا نوٹ رکھ کر ساتھ ہی یہ تحریر لکھ دی کہ پلیز مجھے پاس کردیں۔ ’میری گنجائش ایک ہزار روپے دینے کی ہی ہے‘۔
یہ بھی پڑھیں ملک بھر کے تعلیمی بورڈز کے امتحانات میں اب پاسنگ اور گریس مارکس کتنے ہوں گے؟
چیئرمین انٹرمیڈیٹ تعلیمی بورڈ شرف علی شاہ نے کراچی میں میڈیا سے گفتگو کرتے ہوئے کہاکہ کچھ طلبا و طالبات نے جوابی کاپی پر صرف گانے، کہانیاں اور سوالنامہ ہی لکھا تھا۔
انہوں نے مزید کہاکہ میں نے چیئرمین بورڈ کا چارج لیتے ہی نتائج کی تحقیقات کے لیے ایک کمیٹی تشکیل دی ہے، جس میں ماہر مضامین کو شامل کیا گیا ہے، جبکہ ایک پرنسپل کنونیئر ہیں۔
شرف علی شاہ نے کہاکہ طلبا و طالبات کے ساتھ کوئی ناانصافی نہیں ہوگی، ہم نے اس حوالے سے ایک شکایتی سیل بھی بنا دیا ہے۔
یہ بھی پڑھیں تعلیمی بورڈز مارکنگ سسٹم ختم کرکے گریڈنگ سسٹم متعارف کروا رہے ہیں؟
واضح رہے کہ انٹرمیڈیٹ بورڈف کراچی کے تحت گیارہویں جماعت کے نتائج آنے کے بعد طلبا و طالبات اور والدین سمیت سیاسی جماعتوں کی جانب سے بھی تحفظات کا اظہار کیا گیا تھا، جس کے بعد بورڈ نے ایسا کرنے والے طلبہ کے لیے اسکروٹنی فیس میں 50 فیصد کمی کی ہے۔
