بلو چستان پاکستان کا ایک ایسا منفرد صوبہ ہے، جہاں مختلف اقوام رہائش پذیر ہیں ۔یہاں بسنے والی ہر قوم اپنی ثقافت، روایات، تہذیب و تمدن اور کھانوں کی وجہ سے ایک الگ مقام رکھتا ہے۔ صوبے میں پشتون بڑی تعداد میں آباد ہیں، جن کی ثقافت سب سے نمایاں ہے، تب ہی پشتونوں کے کھانے صوبے بھر میں پسند کیے جاتے ہیں ۔ سرد موسم ہو اور ایسے میں روایتی پشتون پکوان لاندی کا ذکر نہ ہو، ایسا ممکن ہی نہیں ہے۔
یوں تو لاندی کو پہلے گھروں میں تیار کیا جا تا تھا لیکن وقت گزرنے کے ساتھ ساتھ یہ پکوان ہوٹلوں تک بھی پہنچ گیا ہے۔ کوئٹہ شہر کے وسط میں مقامی تاجر نے ایک ایسا ہوٹل کھولا ہے جس میں لاندی سے مختلف اقسام کے پکوان تیار کیے جا تے ہیں۔ ان میں لاندی کا شوربا، چینکی لاندی کڑائی اور لاندی کابلی پلاؤ ان دنوں شہریوں کی پسند بنے ہوئے ہیں۔
یہ بھی پڑھیں: بلوچستان کے روایتی کھانے
وی نیوز سے بات کر تے ہوئے شہریوں کا کہنا تھا کہ لاندی سردیوں کا توڑ ہے اور ایسے کھانا صحت کے لیے بھی مفید ہے، لیکن ان سب چیزوں سے ہٹ کر لاندی کا ذائقہ اپنی مثال آپ ہے۔
ہوٹل کے مالک نے وی نیوز سے بات کر تے ہوئے بتایا کہ لاندی کو ہوٹل میں شروع کر نے کا آئیڈیا مجھے تب آیا جب میں خود لاندھی کے لیے اپنے رشتہ داروں کو فون کرتا تھا، کیونکہ لاندی اکثر اوقات سرد علاقوں میں 20سے 30 دن لگا کر خشک کی جاتی تھی اور بعد ازاں اسے پکا کر کھایا جاتا تھا۔ ایسے میں لاندی کے چاہنے والے بہت تھے لیکن اسے تیار کرنے والے کم تھے، بس اسی وجہ سے میں نے اسے ہوٹل میں شروع کیا اور اب اسے لوگ بے پناہ پسند کررہے ہیں ۔
