خیبرپختونخوا حکومت کا ہوم اسٹے ٹورازم پروگرام ’میزبان‘ کیا ہے اور اس کے لیے اہلیت کیا ہے؟

خیبرپختونخوا حکومت نے سیاحتی علاقوں کے مکینوں کے لیے آمدن کے ذرائع پیدا کرنے اور سیاحت کے فروغ کے لیے ’میزبان‘ کے نام سے ’ہوم اسٹے ٹورازم پروگرام‘ شروع کرنے کا اعلان کیا ہے جس کے تحت سیاحتی علاقوں کے مکینوں کو 30 لاکھ روپے تک کے بلا سود قرضے دے جائیں گے۔

محکمہ سیاحت خیبرپختونخوا اور بینک آف خیبر کے درمیان اس مقصد کے لیے مفاہمت کی یادداشت پر دستخط بھی ہو گئے ہیں، جس کے لیے ابتدائی طور پر 39.5 کروڑ روپے رکھے گئے ہیں اور بینک آف خیبر کے ذریعے یہ قرضے فراہم کیے جائیں گے۔

میزبان کے لیے اہلیت کیا ہے؟

خیبرپختونخوا حکومت کی جانب سے جاری کردہ تفصیلات کے مطابق پہلے مرحلے میں یہ پروگرام صوبے کے سات اضلاع جن اپر چترال، لوئر چترال، اپر دیر، لوئر دیر، مانسہرہ، ایبٹ آباد اور سوات شامل ہیں، میں شروع کیا جارہا ہے۔ اور اس میں فائدہ اٹھانے کے لیے ان اضلاع کا مستقل رہائشی ہونا ضروری ہے۔

پروگرام سے استفادہ کرنے کے لیے قومی شناختی کارڈ اور 20 سے 55 سال کے درمیان عمر ہونی ضروری ہے۔

محکمہ سیاحت کے مطابق خواہشمند افراد پروگرام باقاعدہ شروع ہونے کے بعد آن لائن درخواست دے سکتے ہیں۔ جس کے لیے 16 اسکیل کے سرکاری آفیسر کی جانب سے تصدیق ضروری ہے جبکہ جائیداد یا دیگر دستاویزات بھی جمع کرانی ہوں گی۔

حکومت قرضہ کس مقصد کے لیے دے رہی ہے؟

محکمہ سیاحت کے مطابق اس پروگرام کا مقصد سیاحت کو فروغ دینے کے ساتھ ساتھ سیاحتی علاقوں کے رہائشیوں کو معاشی مواقع فراہم کرنا بھی ہے۔ ’میزبان پروگرام‘ کے تحت مقامی لوگوں کے گھروں میں سیاحوں کو معیاری رہائشی سہولیات کی فراہمی کےلیے 30 لاکھ روپے تک کے بلاسود قرضے فراہم کیے جائیں گے۔

محکمہ سیاحت نے بتایا کہ سیاحوں کو اپنے گھروں کے احاطے میں رہائشی سہولیات فراہم کرنے کے خواہشمند افراد پہلے سے دستیاب کمروں کی تزئین و آرائش یا دو نئے کمرے تعمیر کر سکیں گے۔ سیاحوں کو ان کمروں میں واش رومز اور کچن سمیت دیگر تمام ضروری سہولیات میسر ہوں گی۔

حکومتی اعلامیہ کے مطابق قرضوں کی واپسی کی مدت پانچ سال ہوگی اور واپسی کا عمل قرضہ وصولی کے دوسرے سال سے شروع ہوگا۔ مزید تفصیل اس ویڈیو رپورٹ میں۔