برطانوی وزیر صحت کو سوشل میڈیا پر نامناسب تبصرہ کرنے پر وزارت سے معطل کردیا گیا ہے۔ وزیر صحت نے اپنے حلقہ انتخاب کی بوڑھی خاتون کی جانب سے مسائل حل کرنے کے مطالبے پر تبصرہ کرتے ہوئے کہا تھا کہ انہیں امید ہے کہ 72 سالہ خاتون اگلے انتخابات سے پہلے مر جائیں گی۔
میل آن سنڈے کی رپورٹ کے مطابق برطانوی وزیر صحت اینڈریو گیون (Andrew Gwynne) کو اپنے حلقہ انتخاب کے ووٹرز اور پارلیمنٹ کے دیگر ارکان کی توہین کرنے والے واٹس ایپ پیغامات بھیجنے پر وزارت سے ہٹادیا گیا ہے جبکہ ان کی پارٹی رکنیت بھی معطل کردی گئی ہے۔
مزید پڑھیں: برطانیہ مصنوعی ذہانت کے ذریعے بچوں کے جنسی استحصال کو جرم قرار دینے والا پہلا ملک بننے کو تیار
میل آن سنڈے کے مطابق وزیر صحت نے انتخابی حلقے کے بارے میں نہایت برا مذاق بھی کیا جبکہ کچھ جنسی اور نسلی نوعیت کے تبصرے بھی کیے۔ اس پر دیگر عہدیداران کا کہنا تھا کہ ان پیغامات سے ظاہر ہوتا ہے کہ پارٹی میں گندگی موجود ہے جسے ٹھیک کرنے کی ضرورت ہے، اینڈریو گیون کو لیبر پارٹی کا رکن نہیں رہنا چاہیے۔
لیبر پارٹی کے ترجمان نے کہا کہ 50 سالہ گون کو معطل کر دیا گیا ہے کیونکہ پارٹی ان کے واٹس ایپ گروپ میں کیے گئے تبصروں کی تحقیقات کر رہی ہے جو لیبر پارٹی کے قواعد و ضوابط کے مطابق نہیں۔ اگر یہ پایا گیا کہ انہوں نے لیبر پارٹی ضوابط کی خلاف ورزی کی ہے تو مزید کارروائی کی جائے گی۔
مزید پڑھیں: برطانیہ کے لیے پی آئی اے کی پروازوں کی بحالی سے پاکستان کو کتنا فائدہ پہنچے گا؟
ایڈریو گیون نے معطلی کے بعد اپنے تبصرے پر معافی مانگتے ہوئے کہا کہ نامناسب تبصرے پر بیحد شرمندہ ہوں، وہ وزیراعظم اور لیبر پارٹی کے فیصلے کو سمجھتے ہیں، معطل ہونے پر بہت غمگین ہوں اگر میرے جملے سے کسی کی دل آزاری ہوئی ہو تو میں معافی کا طلبگار ہوں۔
واضح رہے کہ گیون 2005 میں پہلی بار لیبر ایم پی منتخب ہوئے تھے، اور ڈینٹن اور ریڈش کے حلقے کی نمائندگی کی تھی۔ وہ گزشتہ سال حلقہ بندی میں تبدیلی کے بعد گورٹن اور ڈینٹن کے ایم پی منتخب ہوئے تھے۔ وہ گزشتہ موسم گرما کے انتخابات کے بعد حکومت سے الگ ہونے والے تیسرے ایم پی ہیں، اس سے پہلے وزیر خزانہ اور وزیر ٹرانسپورٹ استعفیٰ دے چکے ہیں۔
