سہ ملکی سیریز: جنوبی افریقہ کو شکست دے کر نیوزی لینڈ نے فائنل کے لیے کوالیفائی کرلیا

سہ ملکی سیریز کے دوسرے میچ میں نیوزی لینڈ نے جنوبی افریقہ کو شکست دے کر فائنل کے لیے کوالیفائی کرلیا۔

سہ ملکی سیریز کا دوسرا میچ قذافی اسٹیڈیم لاہور میں کھیلا گیا، جہاں نیوزی لینڈ نے جنوبی افریقہ کے خلاف ٹاس جیت کر پہلے فیلڈنگ کا فیصلہ کیا۔ جنوبی افریقا نے مقررہ 50 اوورز میں 6 وکٹوں کے نقصان پر 304 رنز بنائے۔ اور جواب میں نیوزی لینڈ نے ہدف 48.4 اوورز میں 4 وکٹوں کے نقصان پر پورا کرلیا۔

نیوزی لینڈ بیٹنگ

نیوزی لینڈ کے بیٹر کین ولیمسن 133 اور ڈیون کانوائے 97 رنز بنا کر نمایاں رہے، جبکہ ڈیرل مچل 10 اور ٹام لیتھم صفر پر آؤٹ ہوئے۔

نیوزی لینڈ نے ہدف کے تعاقب میں محتاط انداز میں بیٹنگ کا آغاز کیا اور پہلی وکٹ 50 رنز پر گری، جب ول ینگ 19 رنز اسکور کرکے چلتے بنے۔

جنوبی افریقہ کی بیٹنگ

جنوبی افریقہ کے کپتان ٹیمبا باووما 20 رنز بنا کر کیچ آؤٹ ہوئے، جب جنوبی افریقہ کا اسکور 37 رنز تھا۔ دوسری وکٹ 130 رنز پر گری جب جیسن سمتھ 41 رنز بنا کر رن آؤٹ ہوئے۔ تیسری وکٹ 132 رنز پر گری جب کائل ویرینے ایک رنز بنانے کے بعد بولڈ ہو گئے۔ چوتھی وکٹ 263 رنز پر گری جب اوپنر میتھیو بریٹزکی 150 رنز بنا کر کیچ آؤٹ ہوئے۔

پانچویں وکٹ 300 رنز پر گری جب ویان مُلڈر 64 رنز پر کیچ آؤٹ ہوئے۔ چھٹی وکٹ جلد ہی 303 رنز پر گری جب سینوران مُتھوسوامی 2 رنز پر کیچ آوٹ ہوئے۔ نیوزی لینڈ کی جانب سے میٹ ہنری نے 10 اوورز میں 59 رنز کے عوض 2 وکٹیں، وِل اورورکے نے 72 رنز کے عوض 2 وکٹیں جبکہ مائیکل بریسویل 43 رنز کے عوض ایک کھلاڑی کو آؤٹ کیا۔

میتھیو بریزکے، ون ڈے میچز میں ڈیبیو میچ میں 150 رنز بنانے والے پہلے کھلاڑی بن گئے

جنوبی افریقہ کے اوپنر بلے باز میتھیو بریٹزکی، نے شاندار کھیل کا مظاہرہ کرتے ہوئے 150 رنز مکمل کیے۔ انہوں نے 2 نئے ریکارڈ بھی بنائے وہ ڈیبیو میچ میں سینچری کرنے والے جنوبی افریقہ کے چوتھے کھلاڑی جبکہ ون ڈے انٹرنیشنل کرکٹ کے پہلے کھلاڑی کا اعزاز بھی حاصل کیا۔